Andijon viloyatining Baliqchi tumanida xalq deputatlari kengashining oltinchi chaqiriq, to‘qqizinchi sessiyasi bo‘lib o‘tdi. Unda Oliy Majlis Senati raisi Tanzila Norboyeva ham ishtirok etdi, deya xabar bermoqda “Daryo” muxbiri Umidjon Mamarasulov.
Sessiyani tuman hokimi Jasurbek Abduraimov olib bordi. U sektor rahbarlari bilan birga yo‘l qo‘yilgan kamchiliklar uchun Prezident hamda tumanda yashovchi 199 mingdan ortiq aholidan uzr so‘radi.
Tuman hokimi hududni 2020—2021-yillarda kompleks ijtimoiy-iqtisodiy rivojlantirish orqali “qizil” hududlar qatoridan chiqarish bo‘yicha “yo‘l xaritasi”ni taqdim qildi va shunga asosan yil oxiriga qadar “o‘rta”, 2021-yilda esa “yaxshi” tumanlar qatoriga olib chiqishga va’da berdi.
Hokimning ma’lumot berishicha, 2020-yil oxiriga qadar sanoat yo‘nalishi bo‘yicha jami 283 milliard 416 million so‘mlik 11 ta yirik loyihani ishga tushirish belgilangan. Shuningdek, aholi bandligi darajasini oshirish uchun hududiy investitsiya dasturi asosida 2020-yilning o‘zida 373,6 milliard so‘mlik 59 ta loyiha amalga oshirilishi hisobiga 1879 ta yangi ish o‘rini yaratilishi ko‘zda tutilgan.
Sessiya yakunida Tanzila Norboyeva tumanning “qizil” hududga kirib qolishiga sababchi bo‘lgan omillar haqida gapirib, sessiya davomida so‘zga chiqqan tuman kengashi deputatlaridan birining fikriga e’tiroz bildirdi.
“Sessiya davomida deputatlarimizdan biri tumanda ko‘p yaxshi ishlar bo‘lyapti. Menimcha reytingda ‘qizil’ hududga kirib qolishimizda biz deputatlarning yetarli targ‘ibot-tashviqot ishlarini amalga oshirmaganimiz sabab bo‘ldimikan, dedi. Bu nima degani? Qo‘limizda aniq fakt turibdi. Reyting bo‘yicha so‘ralgan barcha ko‘rsatkichlar Baliqchida juda past. Albatta, bunda deputatlarning aybi bor. Barcha sessiyalarda bugungidek faol bo‘lib, tumandagi barcha davlat idoralari rahbarlari hisobotini eshitganida, balki bunaqa bo‘lmasdi. Gap targ‘ib qilishda emas, deputatlarning qanday ishlashida. Ana shundagina sizlar bugun tasdiqlayotgan ‘yo‘l xarita’ngiz bo‘yicha maqsadga erishasizlar”, — dedi Tanzila Norboyeva.
Senat raisi tayyorlangan “yo‘l xaritasi”ni asos uchun qabul qilishi mumkinligini, lekin uch kun muddatda deputatlarning taklif va tashabbuslari asosida unga o‘zgartirishlar kiritish uchun qayta ko‘rib chiqish lozimligini bildirdi.
Eslatib o‘tamiz, 2020-yil 24-sentabr kuni Prezident Shavkat Mirziyoyev raisligida hududlarda tadbirkorlikni rivojlantirish bo‘yicha qo‘shimcha chora-tadbirlar muhokamasiga bag‘ishlangan videoselektor yig‘ilishi bo‘lib o‘tgandi. Unda hududlarni ijtimoiy-iqtisodiy rivojlantirishni reyting baholash tizimi joriy etilgani, shunga ko‘ra birinchi marta tuman va shaharlardagi iqtisodiy ko‘rsatkichlar, tadbirkorlikni qo‘llab-quvvatlash muhiti, infratuzilma va mavjud resurslardan foydalanish darajasi o‘rganilgandi. Tahlillar asosida ulardagi tadbirkorlik rivoji holati “yaxshi”, “o‘rta” va “qoniqarsiz” hududlarga ajratilgan. Xususan, 48 ta tuman va shahardagi holat “yaxshi”, 119 tasida “o‘rta” hamda 33 tasida “qoniqarsiz” deb topilgan.
Izoh (0)