АОКА биносида 10 август, душанба куни ўтказилган брифингда Маҳалла ва оилани қўллаб-қувватлаш вазирлиги ахборот хизмати раҳбари Саодат Боймирзаева жойларда қандай оилаларга моддий ва бошқа турдаги зарур ёрдамлар кўрсатилиши мажбурий эканлиги масаласига аниқлик киритди.
«Ҳозирда юртимиздаги коронавирус пандемияси шароитида ижтимоий аҳволи ва турмуш шароити оғирлашган ва сектор раҳбарлари томонидан алоҳида назоратга олинган оилаларни қайд этиш мақсадида ‘темир дафтар’ тизими жорий этилган.
Бу рўйхатга аҳолининг мавжуд 7 та ижтимоий ҳолати инобатга олиниб тузилган ҳамда мазкур тоифага киритилган аҳолига зарур ёрдамлар кўрсатилиши мажбурийдир.
Тоифалар ичида ижтимоий нафақаси реал эҳтиёжларни қопламайдиган ва ундан бошқа даромад манбаси бўлмаган ҳамда меҳнатга лаёқатли аъзолари бўлган, бироқ улар ҳеч қаерда ишламайдиган ёки пандемия туфайли даромадидан вақтинча маҳрум бўлган мавсумий ишчи ва зарур ёрдамга муҳтож оилалар алоҳида белгилаб ўтилган», — деди Саодат Боймирзаева.
Аввал Саодат Боймирзаева юқорида таъкидлаб ўтилган эҳтиёжманд оилаларнинг 7 тоифаси ҳақида маълумот берган эди. Қайд этилишича, қуйидаги тоифага кирувчилар учун зарур ёрдамлар кўрсатилиши мажбурийдир:
- кам таъминланган;
- ногиронлиги бўлган;
- ижтимоий ҳимояга муҳтож оилалар;
- якка-ёлғиз кексалар;
- доимий ишсиз фуқаролар;
- карантин туфайли ишсиз қолган фуқаролар;
- оғир эпидемиологик ҳудудлардан қайтариб келинган фуқаролар.
Изоҳ (0)