Ростов-Дон шаҳрининг «Первомайская» станциясидан 10 август, душанба куни вагонида 918 нафар ўзбекистонлик бўлган поезд Тошкентга қараб йўлга чиқди. Бу ҳақда Ташқи ишлар вазирлиги хабар берди.
«Ҳозирда Республика махсус комиссияси томонидан Ўзбекистон фуқароларини ватанимизга тезроқ қайтариш учун Россиянинг турли ҳудудларидан рейсларни кўпайтириш, рейслар, жумладан, темир йўл рейсларининг йўналиши ва турларини кенгайтириш масаласи кўриб чиқилмоқда», — дейилади ТИВ хабарида.
«Kun.uz»нинг Транспорт вазирлигига таяниб маълум қилишича, 9 август куни Россиянинг Самара шаҳридан 925 нафар ўзбекистонлик поездда Тошкентга олиб келинган. Хабарда айтилишича, 13 августда яна 900 дан ортиқ Ўзбекистон фуқароси Ростовдан олиб келиниши кутилмоқда.
Аввалроқ Россиядан поездда олиб келинган 918 нафар ўзбекистонлик Намангандаги карантин зонасига жойлаштирилгани тўғрисида маълум қилинганди.
Эслатиб ўтамиз, Ўзбекистон фуқаролари Қозоғистоннинг коронавирус пандемияси туфайли давлат чегараларини ёпгани оқибатида ватанга қайта олмаган. Аввалроқ Россиянинг Самара вилоятида қолиб кетган қарийб 500 нафар ўзбекистонлик ортга қайтиш учун Қозоғистон чегарасини кесиб ўтишга урингани тўғрисида хабар берилганди. Кейинроқ Оренбург вилояти расмийлари Ўзбекистон фуқаролари 6 август куни чегарани кесиб ўтишлари мумкинлиги тўғрисида маълум қилган.Июль ўрталарида чегара яқинидаги чодирларда минглаб ўзбекистонликларнинг қолиб кетгани ҳақида хабарлар берилганди. Улар ҳам поезд орқали ватанга қайтарилган.
Изоҳ (0)