Ўзбекистонда 2020 йил 7 ой натижаларига кўра, тўқимачилик ва тикув-трикотаж маҳсулотлари экспортини 1 миллиард доллардан оширишга эришилди, дея хабар бермоқда «Ўзтўқимачиликсаноат» уюшмаси матбуот хизмати.
Маълум қилинишича, 2019 йилга нисбатан маҳсулотларнинг экспортдаги ўсиш суръати 112 фоизга таъминланган.
Ип калаванинг жами экспортдаги улуши 49 фоиз, газлама ва трикотаж матолар, тайёр тикув ва трикотаж маҳсулотлар — қўшимча ва юқори қўшилган қийматга эга маҳсулотларнинг улушлари эса 51 фоизга таъминлашга эришилган.
Шунингдек, 395 турдаги тўқимачилик ва тикув-трикотаж маҳсулотлари 57 дан ортиқ давлатларга етказиб берилди. Доимий бозорлар ҳисобланган МДҲ давлатлари қаторида Кувайт, Венгрия, Словакия ва Греция каби давлатларга ҳам илк бора тўқимачилик маҳсулотлари экспорти амалга оширилди.
Экспорт қилинган маҳсулотларнинг асосий қисми Россия (394,5 миллион доллар — 39,2 фоиз), Хитой (187,6 миллион доллар — 18,6 фоиз), Қирғизистон (139,1 миллион доллар — 13,8 фоиз) ва Туркия (123,5 миллион доллар — 12,3 фоиз) ҳисобига тўғри келмоқда.
Изоҳ (0)