Жаҳон соғлиқни сақлаш ташкилотининг (ЖССТ) Европа минтақавий бюроси Бирдамлик ва COVID-19’га жавоб бериш глобал жамғармаси орқали ташкилот Бош қароргоҳи томонидан харид қилинган, умумий қиймати 300 минг АҚШ долларига тенг инсонпарварлик юкининг навбатдаги партиясини ЖССТнинг Ўзбекистондаги ваколатхонаси кўмагида мамлакатга етказиб берди.
Маълум қилинишича, Истанбул рейси орқали 500 та кислород концентратори етказиб берилди. Ҳафта охирида лаборатория ишлари учун зарур бўлган сарфланадиган материаллардан иборат яна бир юк келиши кутилмоқда.
«Пандемиянинг бошидан ЖССТ ваколатхонаси БМТ ҳамкор агентликлари билан биргаликда Соғлиқни сақлаш вазирлиги ва Санитария-эпидемиологик осойишталик ва жамоат саломатлиги хизмати билан яқиндан ишлаб келмоқда. Керакли асбоб-ускуна ва ҳимоя воситаларини етказиб бериш — бу мамлакатга кўрсатилаётган кўмакнинг бир қисмидир.
Булардан ташқари, ЖССТ шифокорлар, ҳамширалар, бошқа тиббий ходимлар малакасини оширишга, лаборатория ходимларини ўқитишга, халқаро тажрибадан фойдаланган ҳолда даволаш протоколларини тузишда кўмаклашишга, коронавирус инфекцияси тўғрисидаги доимий равишда янгиланиб бораётган халқаро ахборотни эркин олиш имкониятини таъминлашга катта эътибор қаратмоқда», — деб тушунтирди ЖССТнинг Ўзбекистондаги вакили, доктор Лиан Куппенс.
Жаҳон соғлиқни сақлаш ташкилоти Тошкентга инсонпарварлик юкларини жўнатишни мунтазам равишда амалга оширяпти. Масалан, июлда мамлакатга умумий қиймати 4 миллион АҚШ долларидан юқори бўлган юклар етказиб берилди. Ўз ичига юз учун 619 400 та ҳимоя қалқончаси ва 2 176 000 дона жарроҳлик ниқобини олган биринчи партия 8 июлда етиб келди.
Тиббиёт ходимлари учун 17 июлда қуйидаги шахсий ҳимоя воситалари қабул қилинди: 95 200 дона ҳимоя кўзойнаги, 178 000 дона ҳимоя комбинезони, 12 000 дона жарроҳлик ниқоби ва 1 064 000 дона КН95 респиратор ниқоби. 24 июлда пойтахтга 38 400 дона тест-тизими ва бошқа лаборатория асбоб-ускунаси етказиб берилди.
Асбоб-ускуналар ва ҳимоя воситалари Соғлиқни сақлаш вазирлиги ва Санитария-эпидемиологик осойишталик ва жамоат саломатлиги хизматига тақдим қилинди.
Мавзуга доир:
Изоҳ (0)