AOKA binosida 10-avgust, dushanba kuni o‘tkazilgan brifingda Mahalla va oilani qo‘llab-quvvatlash vazirligi axborot xizmati rahbari Saodat Boymirzayeva joylarda qanday oilalarga moddiy va boshqa turdagi zarur yordamlar ko‘rsatilishi majburiy ekanligi masalasiga aniqlik kiritdi.
“Hozirda yurtimizdagi koronavirus pandemiyasi sharoitida ijtimoiy ahvoli va turmush sharoiti og‘irlashgan va sektor rahbarlari tomonidan alohida nazoratga olingan oilalarni qayd etish maqsadida ‘temir daftar’ tizimi joriy etilgan.
Bu ro‘yxatga aholining mavjud 7 ta ijtimoiy holati inobatga olinib tuzilgan hamda mazkur toifaga kiritilgan aholiga zarur yordamlar ko‘rsatilishi majburiydir.
Toifalar ichida ijtimoiy nafaqasi real ehtiyojlarni qoplamaydigan va undan boshqa daromad manbasi bo‘lmagan hamda mehnatga layoqatli a’zolari bo‘lgan, biroq ular hech qayerda ishlamaydigan yoki pandemiya tufayli daromadidan vaqtincha mahrum bo‘lgan mavsumiy ishchi va zarur yordamga muhtoj oilalar alohida belgilab o‘tilgan”, — dedi Saodat Boymirzayeva.
Avval Saodat Boymirzayeva yuqorida ta’kidlab o‘tilgan ehtiyojmand oilalarning 7 toifasi haqida ma’lumot bergan edi. Qayd etilishicha, quyidagi toifaga kiruvchilar uchun zarur yordamlar ko‘rsatilishi majburiydir:
- kam ta’minlangan;
- nogironligi bo‘lgan;
- ijtimoiy himoyaga muhtoj oilalar;
- yakka-yolg‘iz keksalar;
- doimiy ishsiz fuqarolar;
- karantin tufayli ishsiz qolgan fuqarolar;
- og‘ir epidemiologik hududlardan qaytarib kelingan fuqarolar.
Izoh (0)