Ўзбекистонда 9 август соат 23:30 дан 10 август соат 23:30 гача коронавирус юқтириб олиш билан боғлиқ 695 та ҳолат қайд этилди. Кетма-кет тўртинчи кун кунлик касалланиш ҳолати 700 га етмаяпти. Бу кунларда 690 дан 695 нафаргача янги беморлар рўйхатга олинди. Янги ҳолатлардан сўнг Ўзбекистонда коронавирусга чалинганлар сони 31304 нафарга етди.
ССВ ҳисоби бўйича 200, «Дарё» ҳисоби бўйича 209 киши коронавирус асоратларидан вафот этган.
Фото: Telegram / @ssvmatbuotkotibi
Янги касалланиш ҳолатлари
Янги касалланган 695 кишининг 552 нафари коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган:
- Тошкент шаҳрида — 348 нафар;
- Тошкент вилоятида — 154 нафар;
- Самарқанд вилоятида — 19 нафар;
- Сирдарё вилоятида — 11 нафар;
- Андижон вилоятида — 11 нафар;
- Жиззах вилоятида — 7 нафар;
- Фарғона вилоятида — 2 нафар.
Шунингдек, Ўртасарой карантин марказида хориждан келган 143 нафар фуқаро орасида COVID-19 аниқланган.
Кун давомида 7 та ҳудудда янги касалланиш ҳолатлари қайд этилди.
Тошкент шаҳрида 348 кишида коронавирус аниқланди. Бу охирги 8 кун ичидаги энг паст кўрсаткич ҳисобланади. Бир кун олдин эса 509 кишида коронавирус қайд этилиб, антирекорд ўрнатилганди. Август ойининг ортда қолган 9 куни ичида Тошкентда энг кам касаллик аниқланган кунда (2 август) ҳам 325 кишида COVID-19 қайд этилди. 1—10 август оралиғида пойтахтда (карантин зонасида аниқланган ҳолатларни ҳисобга олмаса) 4241 та янги ҳолат аниқланди. Шунингдек, 10 август куни Ўртасарой карантин зонасида COVID-19 аниқланган 143 нафар бемордан 59 нафари Тошкент шаҳрида даволанишга киришди.
Тошкент вилоятида 154 кишида коронавирус қайд этилди. Вилоятда 23 июлдан бошлаб ҳар куни касалликка чалиниш ҳолатлари қайд этилмоқда, 26 июлдан бери эса ҳар куни коронавирусга чалинганлар сони 100 нафардан ошмоқда (икки марта 200 тадан ҳам ошди). Шунингдек, 10 август куни Ўртасарой карантин зонасида COVID-19 аниқланган 143 нафар бемордан 84 нафари Тошкент вилоятида даволанишга киришди.
Самарқанд вилоятида 19 кишида коронавирус аниқланди. Вилоятда август ойининг ўзида 344 кишида коронавирус қайд этилди. Бу Самарқанддаги жами касалланиш ҳолатларининг 27 фоизига тенгдир.
Сирдарё вилоятида 11 кишида COVID-19 қайд этилди. Август ойида вилоятда 110 кишида коронавирус аниқланди. Бу Сирдарёдаги жами касалланиш ҳолатларининг 16 фоизига тенг деганидир.
Андижон вилоятида 11 кишида коронавирус аниқланди. Вилоятда сўнгги 16 кун ичида фақат 8 август куни янги ҳолатлар аниқланмади. Андижондаги жами касалланиш ҳолатларининг 1 фоизи 10 августга тўғри келди. Ҳозирда Андижонда коронавирусга чалинганларнинг умумий сони 1103 нафарга етган.
Жиззах вилоятида 7 кишида COVID-19 аниқланди. Вилоятда икки ҳафта ичида биринчи марта янги касалланиш ҳолати қайд этилди. Охирги марта 27 июль куни 3 кишида коронавирус аниқланганди. Жиззах ҳозирда энг кам коронавирус аниқланган (143 та ҳолат) ҳудуд ҳисобланади. Қолган барча ҳудудларда беморлар сони 300 нафардан кўп.
Фарғона вилоятида 2 кишида коронавирус қайд этилди. Август ойида вилоятда 51 кишида коронавирус аниқланди. Фарғона вилоятида 3 августдан бошлаб хусусий мактабгача таълим ташкилотлари, буюм ва чорва моллари, қурилиш маҳсулотлари бозори, сартарошхона ва гўзаллик салонлари фаолиятига рухсат берилганди. 11 августдан бошлаб эса ошхона, ресторан ва кафелар ўз фаолиятини қайта бошлайди.
Ўлим ҳолатлари ва аҳволи оғир беморлар
ССВ Тошкент шаҳрида 4 нафар, Тошкент вилоятида эса 2 нафар, жами 6 нафар коронавирусга чалинган бемор вафот этгани ҳақида хабар берди.
Биринчи ўлим. Тошкент вилояти Қибрай туманида яшаган 44 ёшли А.А. исмли эркак вафот этган.
Иккинчи ўлим. Тошкент шаҳри Шайхонтоҳур туманида яшаган 68 ёшли У.М. исмли аёл вафот этган.
Учинчи ўлим. Тошкент шаҳри Сергели туманида яшаган 63 ёшли Д.С. исмли эркак вафот этган.
Тўртинчи ўлим. Тошкент вилояти Қибрай туманида яшаган 80 ёшли Х.А. исмли эркак вафот этган. Қибрай туманининг ўзида бир кунда иккита ўлим содир бўлди. Тошкент вилоятида 3 августдан бери ҳар куни ўлим ҳолатлари кузатилмоқда ва 8 кун ичида вафот этганлар сони вилоятда 2 баробарга кўпайди (11 нафардан 22 нафарга етди).
Бешинчи ўлим. Тошкент шаҳри Миробод туманида яшаган 50 ёшли Д.А. исмли аёл вафот этган.
Олтинчи ўлим. Тошкент шаҳри Шайхонтоҳур туманида яшаган 68 ёшли М.М. исмли аёл вафот этган.
Ҳозиргача Соғлиқни сақлаш вазирлиги 200 кишининг коронавирус асоратларидан вафот этганини хабар берди. «Дарё» ҳисоби бўйича коронавирусга чалингач, вафот этганлар сони 209 нафарни ташкил этмоқда. Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 19 июль куни Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов коронавирус асоратларидан вафот этгани хабар қилинган. 31 июль куни Жиноят ишлари бўйича Тошкент вилоят суди судьяси, 53 ёшли Хайриддин Шермуҳамедов, 1 август куни Тойлоқ тумани прокурори Фарҳод Абдухолиқов, Инновацион соғлиқни сақлаш миллий палатаси «Буюк келажак» кенгаши эксперти Санжар Жалолов 58 ёшида вафот этганини хабар берилди. Бироқ ушбу тўққиз ҳолат ҳақида ССВ томонидан айни вақтгача ахборот берилмаган.
Таниқли режиссёр Сарвар Каримов ҳам 17 июль куни отаси коронавирус инфекциясидан вафот этгани, аммо унга ташхис қўйилмаганини маълум қилганди. Режиссёрнинг ўзи ва унинг бошқа оила аъзоларида коронавирус тасдиқланган. Шунингдек, 26 июль куни бош вазир ўринбосари Азиз Абдуҳакимов 24 июль куни Самарқанддаги Ипак йўли халқаро туризм университетининг 33 ёшли магистранти Ўткир Темиров касалликдан вафот этганини айтган. Маълум бўлишича, марҳум ўзида COVID-19’нинг барча белгилари бўлса-да, тест ҳам топшира олмаган, касалхонага ҳам ёта олмаган. Қорақалпоғистоннинг Тахтакўпир тумани шифохонасининг 32 ёшли тез тиббий ёрдам ҳамшираси Алия Жиемуратова 28 июль куни коронавирусдан вафот этгани ҳақида «Makan.uz» хабар тарқатди.
Айни пайтда коронавирус инфекциясидан даволанаётган 8112 нафар бемордан 1361 нафари оғир, 387 нафари эса ўта оғир аҳволда.
Касалликдан даволаниш
10 август куни 13 та ҳудудда 950 нафар бемор коронавирусдан соғайди, фақат Қашқадарё вилоятида соғайганлар қайд этилмади. Охирги 12 кун ичида 11 марта кунлик соғайиш кўрсаткичи касалланганлар сонидан ўтиб кетмоқда. Тузалганларнинг
- 476 нафари Тошкент шаҳрида;
- 235 нафари Тошкент вилоятида;
- 104 нафари Самарқанд вилоятида;
- 38 нафари Сурхондарё вилоятида;
- 28 нафари Сирдарё вилоятида;
- 16 нафари Навоий вилоятида;
- 12 нафари Андижон вилоятида;
- 11 нафари Жиззах вилоятида;
- 10 нафари Бухоро вилоятида;
- 7 нафари Наманган вилоятида;
- 7 нафари Хоразм вилоятида;
- 3 нафари Қорақалпоғистон Республикасида;
- 3 нафари Фарғона вилоятида касалликдан фориғ бўлди.
Уларнинг қанчаси уй шароитида, қанчаси стационар шароитда даволанганига аниқлик киритилмаган.
Маълумот учун, Ўзбекистонда коронавирус эпидемияси сабаб соғлиқни сақлаш тизимига тушаётган юкламани бир қадар енгиллатиш мақсадида 5 июлдан бошлаб коронавирус инфекцияси аломатсиз кечаётган беморларга уй шароитида даволанишга рухсат берилган. Куни кеча ССВ коронавирусга чалинган беморларни уй шароитида даволаш бўйича асосий тавсия ва қоидалар ҳам тақдим этганди.
Бироқ Соғлиқни сақлаш вазирлиги коронавирусга чалинганларга доир ахборотларида янги беморларнинг қанчасида касаллик аломатсиз (симптомсиз) кечаётганига аниқлик киритмаяпти, шу боисдан айни вақтда коронавирусдан даволанаётган беморларнинг қанчаси касалхоналарда қолаётгани, қанчаси уй шароитида даволанаётгани маълум эмас.
Ҳозирда касаллик қайд этилган жами 31 304 нафар бемордан 22 992 нафари соғайиб, даволаниш кўрсаткичи 73 фоизни ташкил этмоқда. Бу 17 июндан бери энг баланд кўрсаткич ҳисобланади. Даволаниш кўрсаткичи 21-23 июль кунлари 53 фоизгача тушиб кетганди.
Соғлиқни сақлаш вазирлиги маълумотлари бўйича айни пайтда 8112 нафар бемор COVID-19’дан даволанмоқда. 29 июль куни беморлар сони 9500 дан ортиқ эди. 30 июлдан бошлаб даволанаётган беморлар сони камая бошлади. Айни пайтда даволанаётган беморлар сони 21 июль кундаги беморлар сонидан (ўша куни 8265 нафар бемор даволанаётганди) ҳам камайди.
Ҳозирда энг кўп бемор Тошкент шаҳрида даволанмоқда — 6520 нафар. Фарғонада 7, Жиззахда 9, Навоийда 15, Хоразмда 46, Сурхондарёда 47, Сирдарёда 49, Қашқадарёда 56, Қорақалпоғистонда 56, Андижонда 62, Наманганда 63, Бухорода 70, Самарқандда 100 ва Тошкент вилоятида 1012 нафар бемор қолди.
