O‘zbekistonda 9-avgust soat 23:30 dan 10-avgust soat 23:30 gacha koronavirus yuqtirib olish bilan bog‘liq 695 ta holat qayd etildi. Ketma-ket to‘rtinchi kun kunlik kasallanish holati 700 ga yetmayapti. Bu kunlarda 690 dan 695 nafargacha yangi bemorlar ro‘yxatga olindi. Yangi holatlardan so‘ng O‘zbekistonda koronavirusga chalinganlar soni 31304 nafarga yetdi.
Yangi kasallanish holatlari
Yangi kasallangan 695 kishining 552 nafari koronavirusga chalingan bemorlar bilan muloqotda bo‘lganligi sababli namuna olingan fuqarolar orasida aniqlangan:- Toshkent shahrida — 348 nafar;
- Toshkent viloyatida — 154 nafar;
- Samarqand viloyatida — 19 nafar;
- Sirdaryo viloyatida — 11 nafar;
- Andijon viloyatida — 11 nafar;
- Jizzax viloyatida — 7 nafar;
- Farg‘ona viloyatida — 2 nafar.
Kun davomida 7 ta hududda yangi kasallanish holatlari qayd etildi.
Toshkent shahrida 348 kishida koronavirus aniqlandi. Bu oxirgi 8 kun ichidagi eng past ko‘rsatkich hisoblanadi. Bir kun oldin esa 509 kishida koronavirus qayd etilib, antirekord o‘rnatilgandi. Avgust oyining ortda qolgan 9 kuni ichida Toshkentda eng kam kasallik aniqlangan kunda (2-avgust) ham 325 kishida COVID-19 qayd etildi. 1—10-avgust oralig‘ida poytaxtda (karantin zonasida aniqlangan holatlarni hisobga olmasa) 4241 ta yangi holat aniqlandi. Shuningdek, 10-avgust kuni O‘rtasaroy karantin zonasida COVID-19 aniqlangan 143 nafar bemordan 59 nafari Toshkent shahrida davolanishga kirishdi.
Toshkent viloyatida 154 kishida koronavirus qayd etildi. Viloyatda 23-iyuldan boshlab har kuni kasallikka chalinish holatlari qayd etilmoqda, 26-iyuldan beri esa har kuni koronavirusga chalinganlar soni 100 nafardan oshmoqda (ikki marta 200 tadan ham oshdi). Shuningdek, 10-avgust kuni O‘rtasaroy karantin zonasida COVID-19 aniqlangan 143 nafar bemordan 84 nafari Toshkent viloyatida davolanishga kirishdi.
Samarqand viloyatida 19 kishida koronavirus aniqlandi. Viloyatda avgust oyining o‘zida 344 kishida koronavirus qayd etildi. Bu Samarqanddagi jami kasallanish holatlarining 27 foiziga tengdir.
Sirdaryo viloyatida 11 kishida COVID-19 qayd etildi. Avgust oyida viloyatda 110 kishida koronavirus aniqlandi. Bu Sirdaryodagi jami kasallanish holatlarining 16 foiziga teng deganidir.
Andijon viloyatida 11 kishida koronavirus aniqlandi. Viloyatda so‘nggi 16 kun ichida faqat 8-avgust kuni yangi holatlar aniqlanmadi. Andijondagi jami kasallanish holatlarining 1 foizi 10-avgustga to‘g‘ri keldi. Hozirda Andijonda koronavirusga chalinganlarning umumiy soni 1103 nafarga yetgan.
Jizzax viloyatida 7 kishida COVID-19 aniqlandi. Viloyatda ikki hafta ichida birinchi marta yangi kasallanish holati qayd etildi. Oxirgi marta 27-iyul kuni 3 kishida koronavirus aniqlangandi. Jizzax hozirda eng kam koronavirus aniqlangan (143 ta holat) hudud hisoblanadi. Qolgan barcha hududlarda bemorlar soni 300 nafardan ko‘p.
Farg‘ona viloyatida 2 kishida koronavirus qayd etildi. Avgust oyida viloyatda 51 kishida koronavirus aniqlandi. Farg‘ona viloyatida 3-avgustdan boshlab xususiy maktabgacha ta’lim tashkilotlari, buyum va chorva mollari, qurilish mahsulotlari bozori, sartaroshxona va go‘zallik salonlari faoliyatiga ruxsat berilgandi. 11-avgustdan boshlab esa oshxona, restoran va kafelar o‘z faoliyatini qayta boshlaydi.
O‘lim holatlari va ahvoli og‘ir bemorlar
SSV Toshkent shahrida 4 nafar, Toshkent viloyatida esa 2 nafar, jami 6 nafar koronavirusga chalingan bemor vafot etgani haqida xabar berdi.Birinchi o‘lim. Toshkent viloyati Qibray tumanida yashagan 44 yoshli A.A. ismli erkak vafot etgan.
Ikkinchi o‘lim. Toshkent shahri Shayxontohur tumanida yashagan 68 yoshli U.M. ismli ayol vafot etgan.
Uchinchi o‘lim. Toshkent shahri Sergeli tumanida yashagan 63 yoshli D.S. ismli erkak vafot etgan.
To‘rtinchi o‘lim. Toshkent viloyati Qibray tumanida yashagan 80 yoshli X.A. ismli erkak vafot etgan. Qibray tumanining o‘zida bir kunda ikkita o‘lim sodir bo‘ldi. Toshkent viloyatida 3-avgustdan beri har kuni o‘lim holatlari kuzatilmoqda va 8 kun ichida vafot etganlar soni viloyatda 2 barobarga ko‘paydi (11 nafardan 22 nafarga yetdi).
Beshinchi o‘lim. Toshkent shahri Mirobod tumanida yashagan 50 yoshli D.A. ismli ayol vafot etgan.
Oltinchi o‘lim. Toshkent shahri Shayxontohur tumanida yashagan 68 yoshli M.M. ismli ayol vafot etgan.
Hozirgacha Sog‘liqni saqlash vazirligi 200 kishining koronavirus asoratlaridan vafot etganini xabar berdi. “Daryo” hisobi bo‘yicha koronavirusga chalingach, vafot etganlar soni 209 nafarni tashkil etmoqda. Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqida xabar bergan. Shuningdek, 19-iyul kuni Chilonzor tumani Sanitariya-epidemiologik osoyishtalik markazi bakteriologiya laboratoriyasi mudiri 62 yoshli Marhabo Ahmedova, 22-iyulda Bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i bo‘lib ishlayotgan 66 yoshli Hakimbay Xalimov koronavirus asoratlaridan vafot etgani xabar qilingan. 31-iyul kuni Jinoyat ishlari bo‘yicha Toshkent viloyat sudi sudyasi, 53 yoshli Xayriddin Shermuhamedov, 1-avgust kuni Toyloq tumani prokurori Farhod Abduxoliqov, Innovatsion sog‘liqni saqlash milliy palatasi “Buyuk kelajak” kengashi eksperti Sanjar Jalolov 58 yoshida vafot etganini xabar berildi. Biroq ushbu to‘qqiz holat haqida SSV tomonidan ayni vaqtgacha axborot berilmagan.
Ayni paytda koronavirus infeksiyasidan davolanayotgan 8112 nafar bemordan 1361 nafari og‘ir, 387 nafari esa o‘ta og‘ir ahvolda.
Kasallikdan davolanish
10-avgust kuni 13 ta hududda 950 nafar bemor koronavirusdan sog‘aydi, faqat Qashqadaryo viloyatida sog‘ayganlar qayd etilmadi. Oxirgi 12 kun ichida 11-marta kunlik sog‘ayish ko‘rsatkichi kasallanganlar sonidan o‘tib ketmoqda. Tuzalganlarning- 476 nafari Toshkent shahrida;
- 235 nafari Toshkent viloyatida;
- 104 nafari Samarqand viloyatida;
- 38 nafari Surxondaryo viloyatida;
- 28 nafari Sirdaryo viloyatida;
- 16 nafari Navoiy viloyatida;
- 12 nafari Andijon viloyatida;
- 11 nafari Jizzax viloyatida;
- 10 nafari Buxoro viloyatida;
- 7 nafari Namangan viloyatida;
- 7 nafari Xorazm viloyatida;
- 3 nafari Qoraqalpog‘iston Respublikasida;
- 3 nafari Farg‘ona viloyatida kasallikdan forig‘ bo‘ldi.
Ma’lumot uchun, O‘zbekistonda koronavirus epidemiyasi sabab sog‘liqni saqlash tizimiga tushayotgan yuklamani bir qadar yengillatish maqsadida 5-iyuldan boshlab koronavirus infeksiyasi alomatsiz kechayotgan bemorlarga uy sharoitida davolanishga ruxsat berilgan. Kuni kecha SSV koronavirusga chalingan bemorlarni uy sharoitida davolash bo‘yicha asosiy tavsiya va qoidalar ham taqdim etgandi.
Biroq Sog‘liqni saqlash vazirligi koronavirusga chalinganlarga doir axborotlarida yangi bemorlarning qanchasida kasallik alomatsiz (simptomsiz) kechayotganiga aniqlik kiritmayapti, shu boisdan ayni vaqtda koronavirusdan davolanayotgan bemorlarning qanchasi kasalxonalarda qolayotgani, qanchasi uy sharoitida davolanayotgani ma’lum emas.
Hozirda kasallik qayd etilgan jami 31 304 nafar bemordan 22 992 nafari sog‘ayib, davolanish ko‘rsatkichi 73 foizni tashkil etmoqda. Bu 17-iyundan beri eng baland ko‘rsatkich hisoblanadi. Davolanish ko‘rsatkichi 21-23-iyul kunlari 53 foizgacha tushib ketgandi.
Sog‘liqni saqlash vazirligi ma’lumotlari bo‘yicha ayni paytda 8112 nafar bemor COVID-19’dan davolanmoqda. 29-iyul kuni bemorlar soni 9500 dan ortiq edi. 30-iyuldan boshlab davolanayotgan bemorlar soni kamaya boshladi. Ayni paytda davolanayotgan bemorlar soni 21-iyul kundagi bemorlar sonidan (o‘sha kuni 8265 nafar bemor davolanayotgandi) ham kamaydi.
Hozirda eng ko‘p bemor Toshkent shahrida davolanmoqda — 6520 nafar. Farg‘onada 7, Jizzaxda 9, Navoiyda 15, Xorazmda 46, Surxondaryoda 47, Sirdaryoda 49, Qashqadaryoda 56, Qoraqalpog‘istonda 56, Andijonda 62, Namanganda 63, Buxoroda 70, Samarqandda 100 va Toshkent viloyatida 1012 nafar bemor qoldi.
Izoh (0)