Андижон вилоятининг Андижон шаҳридаги олимпия захиралари ихтисослаштирилган мактаб-интернатида 700 ўринли ташхислаш ва саралаш маркази барпо этилди. Марказда вирусга гумон қилинган беморларга тезкор тиббий ёрдам кўрсатиш бўйича ўқув-амалий машғулот ўтказилди, дея хабар берди «Дарё» мухбири Умиджон Мамарасулов.
Марказга тез тиббий ёрдам бўлими, шаҳар ва қишлоқ оилавий поликлиникалари, қишлоқ врачлик пунктларига мурожаат қилган беморлар ётқизилиб, уларнинг аҳволи ўта оғир, оғир ва енгиллигига қараб сараланади. Беморларнинг клиник белгиларидан келиб чиқиб, улар шифохонага ёки уйида даволаниш учун йўналтирилади.
Маълум қилинишича, марказ тиббий кўрик учун зарур замонавий тиббиёт анжомлар билан таъминланган, ҳар бир койка кислород линияси билан жиҳозланган. Беморларга қаров учун 120 нафар шифокор ва ҳамширадан иборат юқори малакали тиббий персонал ажратилган.
«Дарё» мухбирининг ёзишича, ўқув-йиғин машғулотида вилоят соғлиқни сақлаш, ички ишлар, фавқулодда вазиятлар бошқармалари, Миллий гвардия, санитария-эпидемиология осойишталик маркази ҳамда туман тиббиёт бирлашмалари мутахассислари иштирок этган. Машғулот давомида вирусга гумон қилинган беморларга тиббий ёрдам кўрсатишнинг тезкор тактик ҳолатлари ўрганилган.
Вилоят ҳокимлиги ахборот хизматининг маълум қилишича, коронавирус пандемияси даври учун жами 13820 та захира жой тайёрланган. Уларнинг 10200 таси хориждан кириб келаётган ва касалликка гумон қилинган фуқароларни 10 кунлик карантинда сақлаб туришга мўлжалланган. Шунингдек, вилоятдаги 7 та давлат ва 10 та хусусий шифохоналарда беморларни қабул қилиш учун 2590 та қўшимча жой тайёрланган. Ушбу тиббиёт муассасаларнинг барчаси 100 фоиз тиббий кислород билан таъминланган.
Вилоят ҳокими Шуҳрат Абдураҳмоновнинг айтишича, фавқулодда ҳолат учун ҳам вақтинчалик шифохоналар тайёрланмоқда.
«Бу касаллик қачон тугашини ҳеч ким билмайди. Шу сабабли ҳар қандай ҳолатга тайёр туришимиз керак. Шуларни ҳисобга олиб, жами 14 мингга яқин захира жой тайёрладик. Бундан ташқари фавқулодда ҳолатлар учун яна 10 та жойда 1619 ўринга мўлжалланган вақтинчалик шифохоналарни тайёрлаяпмиз. Айни кунга қадар уларнинг барчаси тайёр ҳолга келтирилди», — дейди Андижон вилояти ҳокими.
Изоҳ (0)