Ўзбекистон Ташқи меҳнат миграцияси агентлиги Жанубий Кореяда ишлаётган ўзбекистонликларни мамлакатда рўй бераётган тўфон сабаб огоҳлантирди.
Маълум қилинишича, август ойининг бошидан бери Жанубий Кореянинг қатор ҳудудларида кучли ёмғир ва кўчкилар кузатилмоқда ва бунинг оқибатида 38 кишининг ҳалок бўлгани ёки бедарак йўқолгани хабар қилинган.
Шунингдек, шу пайтгача 4 мингга яқин аҳоли ўз уйини ташлаб кетишга мажбур бўлган, 9 300 гектар қишлоқ хўжалиги ерлари сув остида қолган. Мамлакат метеорология хизмати Чолла-Намдо вилояти ва Кванжу шаҳрида ёғингарчилик янада кўпайишини тахмин қилмоқда. Тўфоннинг яриморолга қараб ҳаракатланиши эҳтимоли сабабли марказий Чунчхон ва шарқий Гангвон аҳолиси яна кучли ёмғирга тайёрланмоқда.
Қайд этилишича, ҳозирда Жанубий Корея тўфон таъсирида бўлиб, жуда кучли ёмғир ва шамол кутилмоқда. Асосий зарба Корея яриморолининг жанубий ва шарқий ҳудудларида содир бўлиши мумкин.
«Жанубий Корея Ўрмон хизмати мамлакатнинг 16 та ҳудудидаги кўчки хавфининг «жиддий» даражага кўтарилгани ҳақида огоҳлантирган. Айни пайтда ёмғир ёғишда давом этиб, мамлакат жанубини сув босмоқда. Об-ҳаво маълумотига кўра, бу ҳолат марказий ва шимолий ҳудудлар, шу жумладан, пойтахтда ҳам юз беради.
Бугунги кунда Жанубий Кореяда кўплаб ўзбекистонликларнинг вақтинча меҳнат фаолиятини амалга ошираётганини инобатга олиб, улардан эҳтиёткорликни оширишларини, табиий офатларда мамлакатда белгиланган кўрсатмаларга риоя қилишларини сўраймиз», – дейилади агентлик хабарида.
Аввалроқ Жанубий Кореяда кучли ёғингарчилик кузатилаётгани ҳақида хабар берилган эди. Табиий офат натижасида автомобиль ва темир йўлларга жиддий зарар етган.
Табиий офат оқибатлари билан курашиш учун 25 мингдан ортиқ полициячи ва қутқарувчилар, шунингдек, кўнгиллилар жалб қилинган.
Изоҳ (0)