Ўзбекистондаги энг йирик яхна ичимликлар ишлаб чиқарувчи Coca-Cola Ichimligi Uzbekiston Ltd. масъулияти чекланган жамияти устав капиталидаги 57,118 фоиз улуш «Ўзбекозиқовқатхолдинг» компаниясига, 42,882 фоизи эса The Coca-Cola Export Corporation (АҚШ) компаниясига тегишли. Бу ҳақда ЎзА хабар берди.
Маълум қилинишича, Coca-Cola Ichimligi Uzbekiston Ltd. МЧЖни аукцион асосида хусусийлаштириш ишлари бошланган бўлиб, оммавий савдога нуфузли халқаро молия ташкилотлари, хорижий инвестиция воситачилари ва аудиторлик компаниялари ҳам жалб этилмоқда.
Қайд этилишича, бугунги кунда ишлаб чиқаришни маҳаллийлаштириш, иш ўринларини яратиш мақсадида тадбиркорлар учун зарур бўлган барча имкониятлар яратилмоқда.
«Шу қулайликлар асносида маҳаллий тадбиркорларимиз ҳам Coca-Cola Ichimligi Uzbekiston Ltd. МЧЖнинг давлат улушини сотиб олишга даъвогарлик қилишса, ишлаб чиқаришни маҳаллийлаштиришга катта ҳисса қўшган бўлар эди», – дейилади хабарда.
Эслатиб ўтамиз, 2018 йилда Ўзбекистон ҳукумати Coca-Cola Ichimligi Uzbekiston Ltd. МЧЖ ҚКдаги улушини хорижий инвесторга сотмоқчи эканлиги маълум қилинган эди. Европа тикланиш ва тараққиёт банки битимда воситачи сифатида иштирок этиши керак эди. Бироқ кейинроқ мамлакат ҳукуматининг устувор режалари ўзгаргани сабаб жараён тўхтаб қолган эди. 2020 йилнинг март ойида эса Coca-Cola Ўзбекистонга 31 миллион доллар инвестиция киритишни режалаштирилаётгани, июнь охирларида эса Coca-Cola компанияси оммавий савдолар асосида хусусийлаштирилиши тўғрисида хабар берилганди.
Изоҳ (0)