Sulton Тех Group иши бўйича суд қарорини муҳокама қилган қаршилик депутатлар вазиятга тайинли изоҳ беролмади

Қарши туман ҳокимлиги ахборот хизматининг ёзишича, Халқ депутатлари туман кенгашининг олтинчи чақириқ, ўнинчи сессиясида туман ҳокими Мақсуда Мустафоева бошчилигидаги депутатлар Sulton Тех Group иши бўйича Қарши туман Маъмурий суди қарорини муҳокама қилган. Ҳоким бошчилигидаги депутатлар тумандаги фермерлар суд қарори билан тугатилган Silver fiber agro кооперацияси билан ишлашда давом этсин, деган хулосага келган.

Депутатлар, шунингдек, Sulton Тех Group корхонаси фаолиятига шубҳа билан қараган ва унинг фаолияти ҳуқуқни муҳофаза қилувчи органлар томонидан ўрганилсин, дея овоз берган.

«Дарё» мухбири мазкур сессияда муҳокама қилинган масалалар юзасидан туман кенгаши депутатлари билан суҳбатлашди.

Дастлабки суҳбатдош депутат Остонақул Қурбонов сессияда қатнашмаганини, сессия бошланиши арафасида комбайнлари бузилиб қолгани учун чиқиб кетганини айтиб, сессия муҳокамасидаги масаладан бехабарлигини билдирди. Туман ҳокимлиги ахборот хизмати раҳбари Али Эргашев эса сессияда барча депутатлар иштирок этганини маълум қилди.

Депутат Феруза Бозорова эса «Дарё» мухбири саволларига жавоб беришга ожизлигини, қолаверса жавоб беришни истамаслигини айтди.

Сессия ишини олиб борган депутат Полвон Тўлиев ҳам мухбир билан суҳбатлашолмаслигини, қўнғироқ қилинган пайтда жанозада эканлигини, кейинроқ ҳам жавоб бериши даргумонлигини айтиб, ахборот беришдан бош тортди.

Депутат Феруза Аҳмедова эса уларга бу борада кўплаб мурожаатлар тушгани боис туман кенгаши депутатлари суд қарорини муҳокама қилишга ҳақли эканлигини билдирди.

«Қарор қандай қилиб Ўзбекистон Республикаси номидан чиқар экан, ўзимизнинг Қарши туман Маъмурий суди кўриб чиққан-ку», — деди депутат Феруза Аҳмедова суд қарорлари республика номидан чиқишига ажабланар экан.

Депутат Дилором Тилакова сессияда иштирок этган бўлса-да, сессия пайтида хонага кириб-чиқиб юргани учун масала моҳиятини унчалик ҳам тушунмаганини айтди.

«Сессияда қатнашдим, аммо тезроқ жавоб олиб, чиқиб кетиш ҳаракатида бўлдим. Боиси онам бетоб эди. Қолаверса, сессиянинг қарор қисмигача, кириб-чиқиб турдим-да», — деди Дилором Тилакова.

Депутат Адиба Алиқулова эса «Дарё» мухбири саволларини эшитиши билан телефонини ўчирди ва қайта ёқмади.

Депутатларнинг бири сессияда иштирок этмаганини билдирса, бири саволларга жавоб беришга ожизлигини айтди. Яна бири эса суд қарори Ўзбекистон Республикаси номидан чиқишини ҳам билмаслигини сездириб қўйган бўлса, яна бири сессия тартибсиз ўтганига шама қилди. Депутатнинг айтишича, у сессияга хоҳлаган пайти кирган, хоҳлаганида чиққан.

Эслатиб ўтамиз, Қарши туман ҳокимлиги ва Sulton Тех Group ишини кўриб чиққан Қарши туман Маъмурий суди ҳоким ва ҳокимлик мансабдорларига кластер фаолиятига аралашишни тақиқлаб, ҳокимлик томонидан кооперация деб аталаётган МЧЖ гувоҳномасини бекор қилиш тўғрисида қарор чиқарганди.