Qashqadaryo viloyatining Qarshi tumanida fermerlarga bo‘sh shartnoma berib, imzolashga mujbur qilayotgan va “fermerlar ixtiyori bilan tuzilganmiz” deya da’voni ilgari surayotgan tashkilot shunchaki MChJ ekanligi, kooperatsiya bo‘lolmasligi ta’kidlandi. Bu haqda klaster va hokimlik o‘rtasida bo‘lib o‘tayotgan navbatdagi sud majlisida ma’lum qilindi, deya xabar berdi “Daryo” muxbiri.
Sud majlisida so‘z olgan MChJ ta’sischisi Nurbek Mo‘minov Bosh vazir o‘rinbosari O‘ktam Barnoyev rahbarligidagi majlis bayonida belgilanganidek kooperatsiya tuzishga imkoniyat yo‘qligi sababli, shunchaki MChJ tashkil qilinganini, fermerlarga MChJni kooperatsiya deb uqtirishga urinilganini ma’lum qildi.
“Birdaniga kooperatsiya tashkil qilish imkoni yo‘qligi sabab MChJ tuzdik va fermerlarni birlashtirishga harakat qildik. Hozircha bizda hech qanday texnika yo‘q. Shunchaki MChJ tashkilotmiz”, — dedi Nurbek Mo‘minov.
Nurbek Mo‘minovning aytishicha, tuman hokimligi tomonidan kooperatsiya deb ko‘rsatilayotgan tashkilotda hali ishchilar ham yo‘q. Fermerlar bilan shartnoma tuzishda ham Beshkent paxta tozalash zavodi hisobchilaridan foydalanilgan.
Sudda MChJ va fermerlar o‘rtasida tuzilgan shartnomalarda ham kamchiliklar borligi, shartnoma tuzilgan vaqt ko‘rsatilmaganligiga oydinlik kiritildi.
“Bu shartnomalarimiz hali davlat ro‘yxatidan ham o‘tkazilmagan”, — dedi Nurbek Mo‘minov.
Ta’kidlash lozim, avvalroq “Daryo”ga shikoyat qilgan fermerlar ularga bo‘sh shartnomalar berilib, IIB xodimlari orqali bosim o‘tkazish orqali shartnoma tuzilgani haqida gapirib bergandi.
Sud ishida ishtirok etgan Davlat xizmatlari markazi tuman bo‘limi vakili ham tumandagi fermerlarga kooperatsiya deb uqtirilayotgan tashkilot kooperatsiya bo‘lolmasligini, tashkilot MChJ maqomidagi tadbirkorlik subyektiligini ma’lum qildi.
Sud 8-iyun, dushanba kuni soat 11:00 da o‘z ishini davom ettiradi.
Mavzuga doir:
- Qarshi tumani hokimi o‘rinbosari sudda klaster faoliyati to‘xtatilishini klaster rahbarining selektorda qatnashmasligi, hokim telefoniga javob bermasligi bilan izohladi
- Qarshi tuman hokimi va o‘rinbosari sudda ikki xil ko‘rsatma berdi. Qay birining gapi rostligi ochiq qolmoqda
- Qarshi tuman hokimi Maqsuda Mustafoyeva: “Aripovdek quyushqondan chiqadi deb o‘ylasangiz, menda bunday bo‘lmaydi”
Izoh (0)