Qarshi tuman hokimligi axborot xizmatining yozishicha, Xalq deputatlari tuman kengashining oltinchi chaqiriq, o‘ninchi sessiyasida tuman hokimi Maqsuda Mustafoyeva boshchiligidagi deputatlar Sulton Tex Group ishi bo‘yicha Qarshi tuman Ma’muriy sudi qarorini muhokama qilgan. Hokim boshchiligidagi deputatlar tumandagi fermerlar sud qarori bilan tugatilgan Silver fiber agro kooperatsiyasi bilan ishlashda davom etsin, degan xulosaga kelgan.

Deputatlar, shuningdek, Sulton Tex Group korxonasi faoliyatiga shubha bilan qaragan va uning faoliyati huquqni muhofaza qiluvchi organlar tomonidan o‘rganilsin, deya ovoz bergan.

“Daryo” muxbiri mazkur sessiyada muhokama qilingan masalalar yuzasidan tuman kengashi deputatlari bilan suhbatlashdi.

Dastlabki suhbatdosh deputat Ostonaqul Qurbonov sessiyada qatnashmaganini, sessiya boshlanishi arafasida kombaynlari buzilib qolgani uchun chiqib ketganini aytib, sessiya muhokamasidagi masaladan bexabarligini bildirdi. Tuman hokimligi axborot xizmati rahbari Ali Ergashev esa sessiyada barcha deputatlar ishtirok etganini ma’lum qildi.

Deputat Feruza Bozorova esa “Daryo” muxbiri savollariga javob berishga ojizligini, qolaversa javob berishni istamasligini aytdi.

Sessiya ishini olib borgan deputat Polvon To‘liyev ham muxbir bilan suhbatlasholmasligini, qo‘ng‘iroq qilingan paytda janozada ekanligini, keyinroq ham javob berishi dargumonligini aytib, axborot berishdan bosh tortdi.

Deputat Feruza Ahmedova esa ularga bu borada ko‘plab murojaatlar tushgani bois tuman kengashi deputatlari sud qarorini muhokama qilishga haqli ekanligini bildirdi.

“Qaror qanday qilib O‘zbekiston Respublikasi nomidan chiqar ekan, o‘zimizning Qarshi tuman Ma’muriy sudi ko‘rib chiqqan-ku”, — dedi deputat Feruza Ahmedova sud qarorlari respublika nomidan chiqishiga ajablanar ekan.

Deputat Dilorom Tilakova sessiyada ishtirok etgan bo‘lsa-da, sessiya paytida xonaga kirib-chiqib yurgani uchun masala mohiyatini unchalik ham tushunmaganini aytdi.

“Sessiyada qatnashdim, ammo tezroq javob olib, chiqib ketish harakatida bo‘ldim. Boisi onam betob edi. Qolaversa, sessiyaning qaror qismigacha, kirib-chiqib turdim-da”, — dedi Dilorom Tilakova.

Deputat Adiba Aliqulova esa “Daryo” muxbiri savollarini eshitishi bilan telefonini o‘chirdi va qayta yoqmadi.

Deputatlarning biri sessiyada ishtirok etmaganini bildirsa, biri savollarga javob berishga ojizligini aytdi. Yana biri esa sud qarori O‘zbekiston Respublikasi nomidan chiqishini ham bilmasligini sezdirib qo‘ygan bo‘lsa, yana biri sessiya tartibsiz o‘tganiga shama qildi. Deputatning aytishicha, u sessiyaga xohlagan payti kirgan, xohlaganida chiqqan.

Eslatib o‘tamiz, Qarshi tuman hokimligi va Sulton Tex Group ishini ko‘rib chiqqan Qarshi tuman Ma’muriy sudi hokim va hokimlik mansabdorlariga klaster faoliyatiga aralashishni taqiqlab, hokimlik tomonidan kooperatsiya deb atalayotgan MChJ guvohnomasini bekor qilish to‘g‘risida qaror chiqargandi.