«Ўзкомназорат»: Ўзбекистонликларга хориж рақамларидан қилинган шубҳали қўнғироқлар ортида фирибгарлар турган бўлиши мумкин

12 июнь куни Facebook’да кўплаб ўзбекистонликлар ўзларига турли хориж телефон рақамларидан қисқа қўнғироқ бўлгани ҳақида постлар қолдирди. «Ўзкомназорат» давлат инспекцияси мазкур қўнғироқлар хориждаги фирибгарлар томонидан амалга оширилган бўлиши мумкинлигини билдирган ва уларга қайта қўнғироқ қилмасликни тавсия этган.

Инспекция ахборот хизматининг ёзишича, коронавирус пандемияси даврида мобил алоқа операторларининг хизматларидан фойдаланувчи абонентларни фирибгарлик йўли билан алдаб, уларнинг ҳисоб рақамларидан пул ечиб олиш ҳолатлари учраган.

Жумладан, «Вангири» фирибгарлиги, яъни хориж рақамидан қисқа қўнғироқ қилиб, абонент ушбу рақамга қайтиб қўнғироқ қилганидан кейин унинг ҳисобидан катта маблағ ечиб олиш ҳолатлари кузатилган. Фирибгарлар абонентга қўнғироқ қилгач, у жавоб беришга улгурмасидан алоқани узиб қўяди. Айрим одамлар эса хориждан қўнғироқ қилинган ва ўтказиб юборилган бегона рақамга қайтиб қўнғироқ қилиш оқибатида уларнинг ҳисобидан маблағ ечиб олинади.

«Ўзкомназорат» давлат инспекцияси томонидан берилган маълумотга кўра, мобил алоқа операторлари карантин даврида пластик карталарни электрон тизимлар орқали бошқарилишида учраган шубҳали ҳаракатларни мониторинг қилиб, фирибгарликнинг олдини олиш борасида тегишли чоралар кўрмоқда.

Инспекция бу каби салбий ҳолатларнинг олдини олиш учун бегона хориж рақамидан қўнғироқ бўлган ва у ўтказиб юборилган бўлса, ўша рақамга қайтиб қўнғироқ қилмаслик, пластик карта рақами, паспорт серияси ва бошқа шахсий маълумотларни бегоналарга ошкор қилмаслик, ижтимоий тармоқларга жойлаштирмасликни тавсия қилган.

Шунингдек, «Вангири» сўзи япон тилидан олингани, киберфирибгарлик усулларидан бири ҳисобланиши, бунда фирибгарлар турли усуллар билан абонентни пулли рақамга (premium-rate number) қўнғироқ қилишга мажбур қилиб, унинг ҳисобидан маблағ ечиб олиши ҳақида ҳам ахборот берилган.