Марказий Осиё мамлакатлари ва Россия коронавирус пандемияси оқибатлари олдини олиш, жумладан, МДҲ мамлакатлари ҳудудларида бўлиб турган фуқароларга манзилли ёрдам кўрсатишда томонларнинг ваколатли идоралари ўртасида мувофиқлаштириш ва ҳамкорликни давом эттиришни муҳим деб ҳисоблайди. Бу ҳақда Ўзбекистон Ташқи ишлар вазирлиги хабар берди.
Марказий Осиё мамлакатлари ва Россия ташқи ишлар вазирлари ўринбосарлари 2020 йил 21 май куни видеоконференцалоқа шаклида ўтган мажлисда коронавирусга қарши кураш ишларини мувофиқлаштириш масаласини муҳокама қилди. Йиғилишда Ўзбекистон, Қозоғистон, Қирғизистон, Россия, Тожикистон ва Туркманистон ташқи ишлар вазирлари ўринбосарлари иштирок этди.
«Коронавирус пандемияси оқибатлари олдини олиш, жумладан, МДҲ мамлакатлари ҳудудларида бўлиб турган фуқароларга манзилли ёрдам кўрсатишда томонларнинг ваколатли идоралари ўртасида мувофиқлаштириш ва ҳамкорликни давом эттириш муҳимлиги таъкидланди», — дейилади Ўзбекистон ТИВ хабарида.
Шунингдек, тадбир иштирокчилари Марказий Осиё мамлакатлари ва Россия вазирларининг бўлажак учинчи учрашувининг кун тартибини кўриб чиқди.
Афғонистондаги ҳозирги вазият, минтақавий ҳамкорликнинг долзарб масалалари ҳамда халқаро ташкилотлар доирасидаги ўзаро муносабатлар юзасидан фикр алмашилди.
Томонлар савдо-иқтисодий ҳамкорлик ва транспорт-коммуникация соҳасидаги устувор лойиҳаларни илгари суриш бўйича фаол қўшма ишларни давом эттириш зарурлигини таъкидлади.
Аввалроқ 1100 нафар ўзбекистонлик ватанга қайтиш учун Россия—Қозоғистон чегарасига автомобилларда келиб, Қозоғистон томони уларни киритмагани учун тўпланиб қолганди. Шундан сўнг мазкур фуқаролар ёрдам сўраб Ўзбекистон Президентига мурожаат қилди. Мазкур мурожаатдан кейин Ўзбекистон Ташқи ишлар вазирлиги Россия ва Қозоғистон томонлари билан олиб борилган музокаралар натижасида тўпланиб қолган фуқаролар автобусларда Ўзбекистонга олиб келинишини маълум қилди.
Изоҳ (0)