Шавкат Мирзиёев Андижон вилоятига қилган ташрифи давомида Digital City номли технопарк билан танишди. Бу ҳақда Президент матбуот хизмати хабар берган.
5,6 гектар майдонда қуриб битказилган ушбу мажмуа ахборот технологиялари ва инновацион лойиҳаларни қўллаб-қувватлаш, дастурий маҳсулотлар экспортини йўлга қўйишга қаратилган. Бу ерга туманлардан 328 мутахассис жалб этилган.
«Жуда тўғри йўлни танлагансизлар. Бу — серқирра ва истиқболли соҳа. Сизлар бошқалардан 10-15 йил олдин юришларингиз керак. Энг долзарб йўналишлар бўйича дастурий маҳсулотлар яратиб, халқимизга ва хорижликларга қулай хизматлар кўрсатиб, ҳам оилангизга, ҳам жамиятимизга наф келтиришингиз мумкин», — деди Шавкат Мирзиёев.
Технопаркда маҳаллий ёшлар, тадбиркорлар, янги ҳунар ўрганиш истагида бўлган фуқаролар учун кенг қулайликлар яратилган. Жумладан, коворкинг маркази, дата-центр, конференц-зал, кутубхона, инновацион лаборатория ва ўқув хоналари, бизнес инкубатор, медиа марказ, киберспорт хонаси ташкил этилган.
Туманларда ахборот технологиялари бўйича бошланғич ўқув курслари бўлади. Улардан танлаб олинган ёшлар Digital City’да интенсив равишда инглиз тилига ўқитилиб, IT хизматлар кўрсатишга тайёрланади. Технопаркдаги 76 нафар тингловчига мўлжалланган залда йил мобайнида 2 мингдан ортиқ кишини ўқитиш мумкин.
Мажмуада ётоқхона ва ошхона ташкил этиб, шароитларни янада яхшилаш, бундай технопаркларни Ўзбекистоннинг бошқа ҳудудларида ҳам очиш бўйича кўрсатмалар берилди.
Шу ерда ёшлар бандлигини таъминлаш, мактаб битирувчиларини фриланс бозорига тайёрлаш борасидаги ишлар юзасидан ахборот берилди.
Президент технопаркда мутасаддиларга олий ўқув юртига киролмаган ёшлар билан манзилли ишлаш, уларнинг қизиқиш ва лаёқатини ўрганиб, касбга йўналтириш бўйича топшириқлар берди.
Аввал Шавкат Мирзиёев Андижон вилоятига ташрифи доирасида дастлаб Олтинкўл туманидаги «Кўҳна водий баҳори» фермер хўжалигида бўлиб, ғалла ва ғўза ривожини кўздан кечиргани ва ғўза қатор ораларига соя экиш бўйича топшириқ бергани, шунингдек, Президентнинг Андижонда йилига 11 миллион дона тайёр маҳсулот ишлаб чиқарадиган янги тўқимачилик корхонаси, ва Андижон шаҳрида қурилган 7 ва 16 қаватли янги уйларни бориб кўргани, шунингдек Андижондаги «Замонавий қишлоқ» лойиҳаси билан танишгани хусусида хабарлар берилган.
Изоҳ (0)