Олий Мажлиснинг бола ҳуқуқлари бўйича вакили Алия Юнусова ақли заиф болани тиз чўктириб, уни таҳқирлаган икки нафар ўсмирга берилган жазони адолатли деб ҳисобламаслигини айтиб ўтди. Бу ҳақда ЎзА хабар қилган.
Ақли заиф болани тиз чўктириб, уни таҳқирлаган икки нафар ўсмирга берилган жазо мени ҳайрон қолдирди. Бундай ҳолатларда аслида жазо инсоннинг шаъни ва қадр-қимматини таҳқирлаганлиги учун белгиланиши керак. Мазкур вазиятда эса қонунбузарлик қилган ўсмирларнинг асосий қилмиши бир четда қолиб, улар Маъмурий жавобгарлик тўғрисидаги кодекснинг 54-моддаси (Эпидемияларга қарши кураш қоидаларини бузиш) ва 183-моддаси (Майда безорилик) билан жазоланган. Бошқача айтганда, қўпол қилмиш карантин билан хаспўшланган. Ваҳоланки, бунга йўл қўйиш мумкин эмас. Қилмиш учун етарли жазо берилмаслиги ушбу ҳолатларнинг кўпайишига олиб келадиТўғри, биз болажон халқмиз. Бола нотўғри иш қилса, уни кечириш керак деб ҳисоблаймиз кўпинча. Аммо таҳқирланган, бунинг устига ёрдамга муҳтож бола-чи? Аслида у кўпроқ ҳимояга, шафқатга муҳтож эмасми?
Бу каби воқеалар доно халқимизнинг ‘қуш уясида кўрганини қилади’, деган мақолини ҳам ёдга солади. Ҳали вояга етмай туриб шафқатсизлик қилишга жазм этган, бировнинг изза бўлишидан ҳузурланган болалар қандай муҳитда катта бўлгани кишини ўйлантиради. Чунки меҳр кўриб ўсган, тўғри тарбия олган бола бундай ишларни қилишга ҳеч қачон ботинмайди.
Бир қарашда бизда бола ҳуқуқлари ҳимояси билан боғлиқ муносабатлар тўлақонли тартибга солингандек. Аммо инсон ҳуқуқлари, айниқса, бола ҳуқуқлари соҳаси шундай тизимки, давр ва вақт ўтган сари янги-янги ўзгаришлар, қўшимчалар киритилмаса, ҳуқуқни рўёбга чиқаришда муаммолар юзага келаверади.
‘Бола ҳуқуқларининг кафолатлари тўғрисида’ги қонунда боланинг камситилишига йўл қўймаслик, боланинг шаъни ва қадр-қимматини ҳимоя қилиш каби чоралар белгиланган. Шу билан бирга, давлат боланинг барча шакллардаги камситишлардан ҳимоя қилинишини таъминлаш учун зарур чораларни кўриши шарт. Шу нуқтаи назардан бола ҳуқуқларини таъминлаш чораларини кучайтириш билан бирга, бу ҳуқуқларни болаларга, ота-оналарга ҳам чуқурроқ тушунтириш зарурати бор.
Алия Юнусова, Олий Мажлиснинг бола ҳуқуқлари бўйича вакили
Аввалроқ Тошкентда ақли заиф болани уриб, ҳақорат қилган икки ўсмирга нисбатан суд қарори чиқарилгани ҳамда Д.Х. ва О.И.нинг ҳар бирига нисбатан Маъмурий жавобгарлик тўғрисидаги кодекснинг 54-моддаси 1-қисми, 183-моддаси ва 34-моддаси (Бир неча ҳуқуқбузарликни содир этганлик учун маъмурий жазо қўлланиш)га асосан базавий ҳисоблаш миқдорининг беш баравари миқдорида, яъни 1 115 000 сўм жарима жазоси тайинлангани хабар қилинганди.
Изоҳ (0)