Навоий вилоятининг Хатирчи туманида жойлашган «Қўрғонтепа» маҳалла фуқаролар йиғини раиси А.А. фуқаронинг икки ёшга тўлмаган фарзандига нафақа тайинлаш учун 350 минг сўм пора сўраган. Бу ҳақда «Дарё»га Жиноят ишлари бўйича Навбаҳор туман суди маълум қилди.
Аниқланишича, 2020 йилнинг 6 январь куни фуқаро Ш.Қ. маҳалла раисига мурожаат қилиб, моддий аҳволи оғирлиги боис фарзанди учун икки ёшгача бериладиган нафақа тайинлашни сўрайди. Раис эса бу хизмати учун пора талаб қилади. Фуқаро бу ҳақда шу куни масъул ташкилотларга хабар беради.
Бош прокуратура ҳузуридаги иқтисодий жиноятларга қарши курашиш департаментининг Хатирчи туман бўлими ҳамда туман ИИБ ходимлари ҳамкорлигида ўтказилган тадбирда порани котиби орқали олишга уринган раис туман почта алоқа тармоғи биноси олдида қўлга олинган.
Мазкур ишни кўриб чиққан Жиноят ишлари бўйича Навбаҳор туман суди судланувчи А.А.ни Жиноят кодексининг 210-моддаси 2-қисми «в» банди (Пора олиш) билан айблаб, унга нисбатан икки йилга озодликдан маҳрум қилиш жазоси белгиланди ҳамда бир йил олти ой муддатга моддий жавобгарлик ва мансабдорлик лавозимларида ишлаш ҳуқуқидан маҳрум қилинди.
Изоҳ (0)