Ўзбекистон 2019 йилнинг 3—6 декабрь кунлари Европа тикланиш ва тараққиёт банкининг бош котиби Энзо Кватрочоке бошчилигидаги делегацияни қабул қилган. 2020 йил 19 май куни Вазирлар Маҳкамасининг фармойиши билан ана шу ташрифнинг харажатлари сметаси тасдиқланди. Ҳукуматнинг мазкур фармойиши бу каби ҳужжатларни очиқ фойдаланиш учун эълон қилиш бўйича дастлабки ҳолатлардан ҳисобланади. Spot ана шу фармойишга эътибор қаратди.
Маълум бўлишича, харажатларнинг катта қисми транспорт учун кетган — 23,8 миллион сўм. Бу маблағ уч кун давомида учта Mercedes-Benz автомобилидан фойдаланиш учун ажратилган.
Ўзбекистон ҳукумати номидан уюштирилган қабул маросими харажатлари 13,9 миллион сўмни ташкил қилган. Маросимда 15 киши иштирок этган, ҳар бир кишига 931 минг сўмдан тўғри келган.
Инвестициялар ва ташқи савдо вазирлиги номидан ташкил қилинган тушликка 9,7 миллион сўм кетган. Тушликда қатнашган 15 кишининг ҳар бири учун 649 минг сўм ажратилган.
International Hotel Tashkent меҳмонхонасидаги Dome ресторани ижараси 9,2 миллион сўмга тушган. Концерт дастури учун 9 миллион сўм кетган. Эсдалик совғалари хариди 2 миллион сўмга баҳоланган.
Якунда жами харажатлар суммаси 67,8 миллион сўмни ташкил қилган. Фармойишда мазкур маблағларни Вазирлар Маҳкамасининг захира жамғармасидан ажратишни таъминлаш белгиланган.
Аввалроқ Европа тараққиёт ва тикланиш банки Ўзбекистон компанияларини қўллаб-қувватлаш учун 150 миллион доллар, Ўзбекистон банкларига ёрдам тариқасида эса 220 миллон доллар кредит линиялари ажратиши маълум бўлган эди.
Эслатиб ўтамиз, Ўзбекистон Президенти Шавкат Мирзиёев 2020 йил 5 март куни Европа тикланиш ва тараққиёт банки президенти Сума Чакрабарти бошчилигидаги ушбу молиявий институт делегациясини қабул қилганди.
Изоҳ (0)