Монако князида коронавирус инфекцияси топилди. У COVID-19 ни юқтириб олган биринчи давлат раҳбари

Монако князи Альбер II коронавирус юқтириб олди. Бу ҳақда князь саройининг расмий баёнотига таяниб, «РБК» хабар берди.

Маълум қилинишича, князнинг соғлиғи учун хавф мавжуд эмас. У шифокор ва мутахассислар назорати остида турибди.

Расмий баёнотга кўра, князь Альбер ўз уйидаги офисида иш фаолиятини давом эттирмоқда. У ўз маъмурияти, ҳукумат аъзолари билан, шунингдек, ўзининг яқин ходимлари билан доимий алоқада бўлиб турибди.

Княз оиласининг бошқа аъзолари коронавирус юқтириб олганлиги ҳақида маълумот берилмаган.

13 март, жума куни, Канада бош вазири Жастин Трюдонинг рафиқаси Софи Грегуар-Трюдода COVID-19 коронавирус инфекцияси аниқланди. Бош вазир Жастин Трюдо ўзини яхши ҳис қилаётганини, унда коронавирус аломатлари йўқлигини маълум қилган. Бош вазир рафиқаси билан биргаликда 14 кун давомида карантинда бўлади.

Шунингдек, 13 март куни Бразилия оммавий ахборот воситалари президент Жаир Болсонарунинг коронавирус тести ижобий натижа берганини хабар қилди. Аммо кейинчалик Болсонару бу хабарларни рад этиб, у коронавирус юқтирмаганини айтди. 18 март, чоршанба куни, Бразилия президентининг иккинчи текшируви унда коронавирус мавжуд эмаслигини кўрсатди. Бироқ Бразилия Сенати раиси Дави Алколумбре коронавирусга чалингани маълум бўлди. Шунингдек, АҚШда коронавирус билан касалланган биринчи конгрессмен аниқланди.