Арманистон пойтахти Ереван шаҳрида мамлакатнинг собиқ президенти Серж Саргсян устидан суд бошланди. Собиқ президентга қарши 2019 йилнинг 4 декабрида айблов илгари сурилган, деб ёзмоқда «Коммерсантъ».
Маълум қилинишича, 2013 йилда Арманистонда ердан фойдаланувчиларни қўллаб-қувватлаш учун дизель ёқилғиси етказиб бериш бўйича тендер ўтказилганда. Саргсян «Флеш» компаниясига устунлик беришга топшириқ берган. Тендерда эса энг паст нархни «Максхур» компанияси таклиф қилган. Мамлакат Махсус тергов хизмати томонидан маълум қилинишича, собиқ давлат раҳбарининг мазкур ҳаракатлари оқибатида, давлатга бир миллион доллардан ортиқ миқдорда зарар етказилган.
Арманистон ОАВларининг ёзишича, «Флеш» компаниясининг эгаси Барсег Бегларян собиқ президентнинг яқин дўсти ҳисобланади. У ҳам мазкур жиноий ишда мамлакатнинг собиқ қишлоқ хўжалиги вазири Серго Карапетян, собиқ қишлоқ хўжалиги вазири ўринбосари Самвел Галстян ва ўсимликшунослик бошқармасининг собиқ раҳбари Геворк Арутюнян қаторида айбланмоқда.Серж Саргсяннинг ўзи унга қўйилган айбловни тан олмаяпти, унинг адвокатлари ҳамда у раҳбарлик қиладиган Арманистон республика партияси жиноий ишни сиёсий таъқиб деб атамоқда.
Суд биноси олдида Серж Саргсянни унинг тарафдорлари ва партия аъзолари кутиб олди. Собиқ президент уларга қўллаб-қувватлашлар учун миннатдорчилик билдирди.
Шундан сўнг, Серж Саргсян бўлажак суд мавзусини Тоғли Қорабоғ мавзуси билан боғлади. «Арманистонда ҳақиқатан ҳам адолатни ҳамма нарсадан устун қўядиган судьялар бор, деган умиддаман. Менга ва барчангизга аввало Тоғли Қорабоғнинг мустақиллиги ҳамма нарсадан устун ҳисобланади. Мен мунтазам равишда юқори халқаро майдонлардан туриб айтганман ва ҳозир ҳам айтаман — Тоғли Қорабоғ ҳеч қачон Озарбайжон таркибига кирмайди. Бу менинг ҳаётимдаги асосий мақсад эди, у охиригача ва ҳамма жойда ҳамроҳ бўлади», — деди собиқ пресидент.
Суд давомида собиқ президентнинг ҳимоячиси дарҳол ҳужумга ўтди ва прокурор Арсен Мартиросянга қарши даъво эълон қилди. Собиқ президентнинг адвокати Рубен Хакобяннинг сўзларига кўра, тергов давомида прокурор кўплаб процессуал қоидабузарликларни ҳисобга олмаган. Ушбу ишни кўриб чиқаётган судья Вахе Мисакян собиқ президентнинг адвокатлари илтимосига биноан суднинг қарори 26 февраль куни эълон қилинишини айтди.
Эслатиб ўтамиз, икки муддат президентлик лавозимини эгаллаган Серж Саргсян 2018 йилнинг апрель ойида Арманистонни парламент республикасига айланишига эришган ва мамлакат бош вазир этиб сайланганди. Шундан сўнг, мухолифат Серж Саргсян яна ҳокимиятни сақлаб қолганини даъво қилган ва мамлакатда норозилик намойишлари бошланган. Норозиликлар ортидан Серж Саргсян Арманистон бош вазири лавозимини тарк этган. Ереванда Серж Саргсяннинг истеъфоси байрам сифатида нишонланди. Никол Пашинян Арманистоннинг янги бош вазири этиб сайланди.
Изоҳ (0)