Armaniston poytaxti Yerevan shahrida mamlakatning sobiq prezidenti Serj Sargsyan ustidan sud boshlandi. Sobiq prezidentga qarshi 2019-yilning 4-dekabrida ayblov ilgari surilgan, deb yozmoqda “Kommersant”.
Ma’lum qilinishicha, 2013-yilda Armanistonda yerdan foydalanuvchilarni qo‘llab-quvvatlash uchun dizel yoqilg‘isi yetkazib berish bo‘yicha tender o‘tkazilganda. Sargsyan “Flesh” kompaniyasiga ustunlik berishga topshiriq bergan. Tenderda esa eng past narxni “Maksxur” kompaniyasi taklif qilgan. Mamlakat Maxsus tergov xizmati tomonidan ma’lum qilinishicha, sobiq davlat rahbarining mazkur harakatlari oqibatida, davlatga bir million dollardan ortiq miqdorda zarar yetkazilgan.
Armaniston OAVlarining yozishicha, “Flesh” kompaniyasining egasi Barseg Beglaryan sobiq prezidentning yaqin do‘sti hisoblanadi. U ham mazkur jinoiy ishda mamlakatning sobiq qishloq xo‘jaligi vaziri Sergo Karapetyan, sobiq qishloq xo‘jaligi vaziri o‘rinbosari Samvel Galstyan va o‘simlikshunoslik boshqarmasining sobiq rahbari Gevork Arutyunyan qatorida ayblanmoqda.Serj Sargsyanning o‘zi unga qo‘yilgan ayblovni tan olmayapti, uning advokatlari hamda u rahbarlik qiladigan Armaniston respublika partiyasi jinoiy ishni siyosiy ta’qib deb atamoqda.
Sud binosi oldida Serj Sargsyanni uning tarafdorlari va partiya a’zolari kutib oldi. Sobiq prezident ularga qo‘llab-quvvatlashlar uchun minnatdorchilik bildirdi.
Shundan so‘ng, Serj Sargsyan bo‘lajak sud mavzusini Tog‘li Qorabog‘ mavzusi bilan bog‘ladi. “Armanistonda haqiqatan ham adolatni hamma narsadan ustun qo‘yadigan sudyalar bor, degan umiddaman. Menga va barchangizga avvalo Tog‘li Qorabog‘ning mustaqilligi hamma narsadan ustun hisoblanadi. Men muntazam ravishda yuqori xalqaro maydonlardan turib aytganman va hozir ham aytaman — Tog‘li Qorabog‘ hech qachon Ozarbayjon tarkibiga kirmaydi. Bu mening hayotimdagi asosiy maqsad edi, u oxirigacha va hamma joyda hamroh bo‘ladi”, — dedi sobiq president.
Sud davomida sobiq prezidentning himoyachisi darhol hujumga o’tdi va prokuror Arsen Martirosyanga qarshi da’vo e’lon qildi. Sobiq prezidentning advokati Ruben Xakobyanning so‘zlariga ko‘ra, tergov davomida prokuror ko‘plab protsessual qoidabuzarliklarni hisobga olmagan. Ushbu ishni ko'rib chiqayotgan sudya Vaxe Misakyan sobiq prezidentning advokatlari iltimosiga binoan sudning qarori 26-fevral kuni e’lon qilinishini aytdi.
Eslatib o‘tamiz, ikki muddat prezidentlik lavozimini egallagan Serj Sargsyan 2018-yilning aprel oyida Armanistonni parlament respublikasiga aylanishiga erishgan va mamlakat bosh vazir etib saylangandi. Shundan so‘ng, muxolifat Serj Sargsyan yana hokimiyatni saqlab qolganini da’vo qilgan va mamlakatda norozilik namoyishlari boshlangan. Noroziliklar ortidan Serj Sargsyan Armaniston bosh vaziri lavozimini tark etgan. Yerevanda Serj Sargsyanning iste’fosi bayram sifatida nishonlandi. Nikol Pashinyan Armanistonning yangi bosh vaziri etib saylandi.
Izoh (0)