Жанубий Кореяда янги турдаги коронавирусни юқтириб олиш билан боғлиқ 169 та янги ҳолат қайд этилди, бир нафар бемор вафот этган. Шундай қилиб, Жанубий Корея Соғлиқни сақлаш вазирлиги ҳузуридаги Касалликлар назорати ва профилактика марказлари ташкилоти (KCDC) ахборотига кўра, мамлакатда коронавирус билан касалланганлар сони 1146 кишига етган, улардан 11 нафари вафот этган.

22 бемор тузалган, 16 734 кишининг таҳлиллари эса ҳали ўрганилмоқда. Маълум бўлишича, олти нафар қурбоннинг касалланиши Тегу яқинидаги Чхондо шаҳрида жойлашган Тенам округ касалхонаси билан у ёки бу даражада боғлиқ.

KCDC маълумотларига кўра, янги касалланганларнинг 134 нафари Тегу шаҳрида, 19 нафари Кёнсан-Пукто провинциясида, қолганлари эса мамлакат бўйлаб бошқа туманларда рўйхатга олинган. 36 ёшли эркак эса Жанубий Кореяда коронавирусдан вафот этган 11-шахс бўлди, у касалликни кимдан ва қандай юқтириб олгани суриштирилмоқда.

Yonhap агентлигининг хабар беришича, вафот этган эркак жигар сиррози ва сўнгги босқичдаги буйрак етишмовчилигидан азият чеккан. У буйрак кўчириб ўтказиш операцияси учун 12 февраль Жанубий Кореяга келган, бироқ саломатлиги ёмонлиги боис операцияни ўтказиб бўлмаган.

Шифокорларнинг сўзларига кўра, «бемор ўзининг сурункали касалликларидан вафот этган, деб тахмин қилиш мантиқлироқ бўларди». Таъкидланишича, унинг ўлимида коронавирус қанчалик рол ўйнаганини ҳали аниқлаш лозим.

Жанубий Кореяда аниқланган коронавирус инфекцияси билан касалланиш ҳолатларининг 900 дан ортиғи Тегу шаҳри ва унга қўшни Кёнсан-Пукто провинциясига тўғри келмоқда. Жанубий Корея авиакомпаниялари Тегуга рейсларни вақтинча бекор қилди.

Жанубий Корея президенти Мун Чже Ин 25 февраль куни вазиятни «фавқулодда жиддий» деб атаб, шаҳарни «алоҳида фалокат ҳудуди» деб эълон қилишнинг ўзи етарли бўлмаслиги мумкинлигини таъкидлаган эди.

Ҳозирги вақтда Тегу шаҳри ва Кёнсан-Пукто провинцияси алоҳида эпидемиологик назорат ҳудудлари деб эълон қилинган. Аввалроқ Жанубий Корея эпидемиологик таҳдид даражасини учинчи «оловранг» даражадан тўртинчи «қизил» даражагача оширгани маълум бўлган эди.

Хабар беришларича, келгуси бир неча кун ичида мамлакатда коронавирус инфекциясини юқтириб олганлар сони кескин ошиши мумкин, чунки Жанубий Корея ҳукумати 200 мингга яқин одамни бирлаштирган Синчонжи сектасининг барча аъзоларини касалликка қарши текшириб кўришга қарор қилган.

Эслатиб ўтамиз, Тегу шаҳрида истиқомат қилувчи Синчонжи сектаси издоши ҳисобланган аёл коронавирус тестидан ўтишдан бош тортиб, икки ҳафта давомида мингга яқин одам билан бирга ибодатларда иштирок этиши Жанубий Кореяни жаҳондаги учинчи энг йирик коронавирус ўчоғига айлантирган эди.