Ҳиндистоннинг Нью-Дели шаҳрида 24 февраль, душанба куни, фуқаролик бўйича янги қонун туфайли содир бўлган тўқнашувларда ҳалок бўлганлар сони 17 кишига етди. Бу ҳақда «ТАСС» хабар бермоқда. Аввалроқ 7 киши ҳалок бўлгани, 150 дан ортиқ одам жароҳатлангани ҳақида хабар берилган эди.
Хабарда айтилишича, чоршанбага ўтар кечаси бош вазирнинг миллий хавфсизлик бўйича маслаҳатчиси Ажит Довал шошилинч йиғилиш ўтказиш учун Деҳли шимоли-шарқидаги полиция бошлиғининг идорасига ташриф буюрган.
Пойтахт полицияси ҳозирча вазиятни мустақил ҳал қилиш учун етарли кучларга эга эканлигини айтиб, шаҳарга қўшин юбориш таклифини рад этган. Бироқ бир қатор оммавий ахборот воситаларида агар ҳуқуқ-тартибот идоралари ходимлари вазиятни ўнглай олмаса, ҳарбийларнинг пойтахтга кириши мумкинлиги айтилмоқда.
Эслатиб ўтамиз, Ҳиндистондаги тўқнашувлар 24 февраль, душанба куни, фуқаролик бўйича янги қонун туфайли содир бўлган эди. Ҳиндистон парламенти томонидан фуқаролик тўғрисидаги қонунга киритилган тузатишларга мувофиқ, Афғонистон, Покистон ва Бангладеш каби қўшни мамлакатлардан қочиб келган мусулмон бўлмаган шахслар, агар улар ўз ватанларида таҳқирлашларга учраётган бўлса, Ҳиндистон фуқаролигини соддалаштирилган тартибда олиши мумкин.
Ушбу қонун ҳиндистонлик мусулмонларнинг норозилигига сабаб бўлди. Уларнинг фикрича, сўнгги тузатишлар конституцияга зид, чунки расман дунёвий ҳисобланган мамлакатда аҳолининг бир қисми диний эътиқодидан келиб чиқиб камситилмоқда. Ҳиндистон шимоли-шарқий штатлари аҳолиси ҳам қонунга эътироз билдирган — энди улар Бангладешдан келган миллионлаб одамлар уларнинг штатларида доимий қолиб кетишидан хавотирда. Бу ҳолат норозилик намойиши иштирокчиларининг фикрича, маҳаллий аҳоли манфаатларига зид.
Қонунга киритилган тузатишлардан кейин унинг тарафдорлари ва қаршилар ўртасида тўқнашувлар содир бўлмоқда.
Изоҳ (0)