Хитой ҳукумати коронавирусга қарши курашиш учун 14,36 миллиард доллар сарфлаб юборди. Бу ҳақда Хитой Марказий телевидениесига таяниб, «ТАСС» хабар берди.
Маълумотларга кўра, ҳукумат касалликка чалинганларни даволаш, бинолар ва объектларни дезинфекция қилиш, шунингдек, ҳимоя учун бошқа зарурий чораларни молиялаштиришни фаол давом эттирмоқда. Маблағларнинг асосий қисми коронавирусга чалинганларнинг асосий қисмини ташкил этаётган Хубэй провинциясига йўналтирилган. Марказий давлат бюджети мамлакатдаги барча ажратилган маблағларнинг учдан бир қисмини ташкил этади, қолган қисми вилоят администрациялари томонидан мустақил равишда таъминланмоқда.
Сўнгги кунларда мамлакатнинг деярли барча қисмида вазият барқарорлашган. Шунга қарамай Жаҳон соғлиқни сақлаш ташкилоти мутахассисларининг тавсиясига кўра, Хитойга келганларда вирусни юқтириб олиш хавфи ҳамон мавжуд. Шу сабабли яқин вақт ичида расмийлар ҳушёрликни сақлашда давом этади ва қайта авж олишнинг олдини олиш учун кучайтирилган чораларни кўради.
Аввалроқ АҚШ коронавирус қайд этилган Хитой ва бошқа мамлакатларга 100 миллион доллар ажратиши маълум қилинган эди. Хитой Молия вазирлиги эса коронавирусга қарши курашиш учун қарийб 3,9 миллиард доллар миқдорида маблағ ажратди. Қозоғистон эса мазкур вирус билан курашиш учун 9,2 миллион доллар маблағ ажратганини маълум қилди.
Маълумотларга кўра, Хитойнинг материк қисмида коронавирус инфекцияси билан касалланганлар сони 78 минг кишидан ошиб кетган, вафот этганларнинг умумий сони эса 2715 кишига етди.
Изоҳ (0)