Касалланганлар ва вафот этганлар
- Хитой соғлиқни сақлаш миллий комиссияси берган маълумотга кўра, янги турдаги 2019-nCoV коронавируси билан касалланганлар сони 24 324 кишига етган.
- Жаҳон Соғлиқни сақлаш ташкилоти коронавирус билан инфекцияланганлар 20 630 (Хитойда 20 471 киши) кишини ташкил қилиб, 20 дан ортиқ мамлакатда 159 ҳолатда коронавирус тасдиқлангани ҳақида хабар берди.
- 490 киши вирус қурбони бўлгани маълум қилинган.
Ўзбекистондаги вазият
Ўзбекистон иқтисодиёти яқин келажакда қийин шароитларга дуч келиши мумкин. Бу маълумот Fitch Solutions компаниясининг шарҳида келтирилган. Таҳлилчиларнинг фикрича, 2020 йилда Ўзбекистон иқтисодиётининг реал ўсиши 5,4 фоизгача пасаяди. Бунинг сабаби ташқи чекловлар, жумладан, Ухандаги коронавируснинг тарқалиши бўлиб, бу Хитойнинг ўсиш истиқболлари учун, айниқса, савдо ва импортга бўлган талаб нуқтаи назаридан жиддий хавф туғдиради. Маълумот учун, Ўзбекистон экспортининг энг катта улуши айнан Хитойга тўғри келади.
Санитария-эпидемиологик осойишталик агентлиги коронавирус инфекциясига қарши курашиш штаби Хитойдан 2 ва 4 февраль куни олиб келинган 157 нафар ҳамда 251 нафар ўзбекистонлик тўғрисида маълумот бериб, Пекиндан қайтганларда коронавирус аниқланмаганини маълум қилди.
5 февраль, чоршанба куни, Хитойнинг мураккаб эпидемик вазият ҳукм сураётган Ухань шаҳридан яна 84 нафар Ўзбекистон фуқароси олиб келинди. Қозоғистон Ташқи ишлар вазирлиги 84 нафар ўзбекистонлик орасида 5 нафар Қозоғистон фуқароси ҳам борлигини маълум қилди. «Қозоғистон томонининг илтимосига кўра, бугун тунда Хитойнинг Ухань шаҳридан Россия ва Ўзбекистоннинг махсус бортларида 8 нафар Қозоғистон фуқароси эвакуация қилинди. Беш нафар фуқаро Тошкент шаҳрида икки ҳафта давомида шифокорлар назорати остида бўлишади, қолган учаласи Тюмень шаҳрида бўлишади», — дейилади хабарда.
Ўзбекистонликлар коронавирусдан қандай ҳимояланмоқда? Тошкент кўчаларида ёш-у қарининг ниқоб тақиб юрганини кўриш мумкин. «Дарё» фотомухбири Мадина Нурман ўзбекистонликларнинг коронавирус билан курашаётгани акс этган фотожамланма тайёрлади.
Жаҳондаги вазият
Хитойда мисга нисбатан талабнинг қисқариб бораётгани сабаб дунё бозоридаги мис нархи охирги 13 кун давомида пастлаб бормоқда. 4 февраль, сешанба куни, Brent туридаги нефть нархи 13 ой мобайнидаги энг паст кўрсаткичга тушиб, бир баррель нархи Лондоннинг ICE биржасида 54,7 АҚШ долларигача пасайгани, нарх тушишига эса коронавирус сабаб бўлгани хабар қилинганди.
Moody’s халқаро рейтинг агентлиги экспертлари Хитой ҳукумати томонидан коронавирус тарқалишига қарши кўрилаётган кескин чоралар спиртли ичимликлар савдосининг қисқаришига олиб келиши мумкинлигини маълум қилди. Экспертлар аҳолиси кўп миллионли шаҳарларнинг карантин учун ёпилиши, Хитойга келадиган сайёҳлар ва чет давлатларига борадиган хитойликларнинг камайиши, авиарейслар бекор қилиниши спиртли маҳсулотларга бўлган талабга салбий таъсир кўрсатишидан хавотирда.
Россельхозбанк соҳавий экспертиза маркази мутахассисларига кўра, Хитойда коронавируснинг тарқалиши Россияда саримсоқнинг тақчил бўлиб қолишига олиб келиши мумкин. Маълумотларга кўра, эпидемия туфайли Россия савдо тармоқлари Хитой маҳсулотларини сотиб олишни тўхтатган.
Коронавируснинг тарқалиши сабаб Гонконг ва Шанхайдаги кўнгилочар боғлари икки ойга ёпиладиган The Walt Disney Company 175 миллион доллар зарар кўрадиган бўлди.
Коронавируснинг тарқалиши фонида КХДР ҳукумати хорижий давлатлар дипломатларига мамлакатга кириш ва чиқишни тақиқлаб қўйди. «Ўзингизга боғлиқ бўлмаган сабабларга кўра, мамлакатга келган бўлсангиз, Пхеньянга кириш пунктларидаги 15 кунлик карантин тугаганидан кейин рухсат этилади», — дейилади ҳукуматнинг расмий хабарида.
Жаҳон соғлиқни сақлаш ташкилоти эса 2019-nCoV коронавируси тарқалиши пандемия, яъни дунё миқёсидаги кучли эпидемия деб тан оладиган даражага етмаганини билдириб, янги турдаги коронавируснинг тарқалишига қарши курашиш учун яқин уч ойда 61,5 миллион доллар керак бўлишини маълум қилди.
Қозоғистон молия вазири Алихан Смаилов мамлакат коронавирус тарқалишининг олдини олишга қаратилган чора-тадбирлар учун 3,5 миллиард тенге (9,2 миллион доллар) ажратгани ҳақида маълум қилди. Ажратилган маблағлар Хитойдан Қозоғистон фуқароларини эвакуация қилиш, тиббий ускуналар, тепловизорлар ва бошқа дори-дармонлар сотиб олишга йўналтирилади.
Хитойлик вирусологлар инфекция қўзғатувчи коронавируснинг генларини ўрганиб, унинг 2003 йилда бутун дунёга тарқалган SARS атипик пневмониясининг «яқин қариндоши» деган хулосага келди. Ухандаги коронавирус ДНКси 17 йил муқаддам 700 дан ортиқ одамнинг ҳалок бўлишига сабабчи бўлган оғир ўткир респиратор синдром — SARS’нинг генетик коди билан 80 фоизга ўхшашлиги маълум бўлди. «Коронавируснинг авж олиши ҳайвонлардан одамга юқадиган вируслар жуда хавфли касалликлар келтириб чиқаришини кўрсатиб қўйди», — дейди олимлар.
Хитойда короновирус тарқалаётган пайт Саудия Арабистони ва Вьетнамда юқори патогенли парранда гриппининг тарқалиш ҳолати қайд этилди. Саудияда касалликдан 22,7 минг парранда нобуд бўлган, Вьетнам шимолида, Хитой билан чегара яқинида жойлашган қишлоқда парранда гриппидан 2,2 мингта парранда ўлган. Аввалроқ, Хитойда, коронавирус эпимаркази яқинидаги ҳудудда парранда гриппи тарқалгани ҳақида хабар берилганди.
Жанубий Кореяда эпидемия билан курашиш бўйича штаб бошлиғи Чон Ин Гённинг сўзларига кўра, коронавирусдан тузалган илк беморга 5 февраль, чоршанба куни, уйига жавоб берилди. Коронавирус билан касалланган ушбу бемор 13 кун деганда тузалди.
Австриянинг Зальцбург шаҳрида эса коронавирусга чалинганликда гумонланган бемор касалхонадан қочиб кетди. 31 ёшли аёл врачлар уни текшириб, юқумли касалликлар бўлимига ётқизгандан кейин қочган. Полиция уни уйдан топиб, яна касалхонага келтиргани айтилмоқда.
Хитой ҳукумати мамлакатда тарқалган коронавирус сабаб фавқулодда ҳолат эълон қилмаган бўлса ҳам, ҳукумат Янги йил таътилларини узайтирган, ишлаб чиқариш корхоналарининг аксарияти ёпилган, фуқаролардан кўчиб юрмаслик ва бошқа одамлар билан мулоқотга киришмасликни сўрамоқда. Шаҳарларнинг кўчалари ҳувуллаб қолган. Мазкур ҳавола орқали бўм-бўш кўчаларнинг суратлари жамланмасини кўриш мумкин.
Изоҳ (0)