Fotoreportaj: Koronavirus tufayli bo‘shab qolgan Xitoy ko‘chalari

Garchi Xitoy hukumati mamlakatda tarqalgan koronavirus kasalligi tufayli favqulodda holat e‘lon qilmagan bo‘lsa ham har yili beriladigan Yangi yil ta’tillari uzaytirilgan, ishlab chiqarish korxonalarining aksariyati yopilgan, fuqarolardan ko‘chib yurmaslik va boshqa odamlar bilan muloqotga kirishmaslik so‘ralmoqda. Ba’zi shaharlarning ko‘chalari huvullab qolgan. “RBK” nashrining fotoreportajida bo‘m-bo‘sh ko‘chalarning suratlari jamlangan.

Joriy yilning 27-yanvar kuni Xitoy hukumati koronavirus tarqalib ketishining oldini olish maqsadida Yangi yil ta’tillarini uzaytirishga qaror qildi. Ta’til kunlari 26-yanvarda tugashi kerak edi. Xitoy Xalq Respublikasi davlat kengashining farmoni barcha viloyatlar, markaziy boshqaruv shaharlari va avtonom hududlarga birdek taalluqli.

Yangi virus keltirib chiqargan kasallik oqibatida 400 nafardan ko‘proq odam halok bo‘lgan. Zararlanganlarning ko‘pchilik qismi Xitoyda. 3-fevral holatiga ko‘ra, 17 391 nafar odam kasallikka chalingan (shundan 17 238 nafari Xitoyda).

Xitoy moliyaviy bozorlari 3-fevral, dushanba kuni, ochildi. Shanxay birjasining fond indeksi bozor ochilgan vaqtda 8 foizga pastlagan — bu oxirgi to‘rt yil ichidagi eng yomon natija.

Virusning tarqalishi Xubey viloyati markazi hisoblangan Uxan shahrida boshlangan.

Ayni vaqtda Uxan viloyatdagi boshqa shaharlar kabi yopib qo‘yilgan.

Koronavirus tarqalgani haqidagi xabarlar va hukumat tomonidan qo‘yilgan cheklovlar tufayli Xitoyda neftga bo‘lgan talab 20 foiz pastlagan.

Xitoy shaharlarida yashovchi aholiga ko‘chib yurmaslik, qo‘llarni tozalab yuvib va o‘zaro muloqotlarni qisqartirish tavsiya qilingan.

Ayrim mamlakatlar, jumladan, Rossiya Xitoy shaharlari bilan bog‘lovchi avia va temir yo‘l qatnovlarini to‘xtatgan.

Xitoy turistlar tashrifi ko‘p kuzatiladigan ayrim joylar, jumladan, Buyuk Xitoy devori va Shanxaydagi Disneylendni vaqtincha yopgan.

Katta shaharlarning ko‘pchiligida ko‘chalar har kuni sanitariya qayta tozalovidan o‘tkazilmoqda.