Хитойнинг мураккаб эпидемик вазият ҳукм сураётган Ухань шаҳридан 84 нафар Ўзбекистон фуқаросининг мамлакатга олиб келингани хабар берилган эди. Kazinform’нинг Қозоғистон Ташқи ишлар вазирлигига таяниб хабар беришича, улар орасида 5 нафар Қозоғистон фуқароси ҳам бор.
«Қозоғистон томонининг илтимосига кўра, бугун тунда Хитойнинг Ухань шаҳридан Россия ва Ўзбекистоннинг махсус бортларида 8 нафар Қозоғистон фуқароси эвакуация қилинди. Беш нафар фуқаро Тошкент шаҳрида икки ҳафта давомида шифокорлар назорати остида бўлишади, қолган учаласи Тюмень шаҳрида бўлишади», — дейилади хабарда.
ТИВ матбуот хизматининг маълум қилишича, эвакуация қилинганлар орасида ҳарорати кўтарилиши боис ХХР эпидемиологик хизматлари томонидан чиқарилмай келган Янцзи университети 1-курс талабаси ҳам бор.
«Самолётга чиқиш олдидан Қозоғистон фуқаролари қўшимча тиббий текширувдан ўтказилди, ҳеч кимда иситма ёки коронавирус симптомлари аниқланмаган», — дейилади хабарда.
Эслатиб ўтамиз, Хитойдаги Ўзбекистон фуқароларини эвакуация қилиш бўйича дастлабки чартер рейс 4 февраль, сешанба куни, соат 17:20 да Пекин—Тошкент йўналиши бўйича 251 нафар Ўзбекистон фуқаросини олиб келган эди. Уларда коронавирус аниқланмагани айтилди.
Изоҳ (0)