Jahon sog‘liqni saqlash tashkiloti Xitoyda tarqalgan yangi koronavirus hali pandemiya darajasiga chiqmaganini ma’lum qildi

Jahon sog‘liqni saqlash tashkiloti 2019-nCoV koronavirusi tarqalishi uni pandemiya, ya’ni dunyo miqyosidagi kuchli epidemiya deb tan oladigan darajaga yetmaganini bildirdi, deb yozmoqda “RBK”.

JSSTning pandemik va epidemik kasalliklar bo‘limi boshlig‘i Silviya Brian matbuot anjumanida pandemiya haqida gapirishga hali erta ekani, koronavirusni ko‘plab o‘choqlarga ega epidemiya deb atash to‘g‘riligi, ushbu o‘choqlarning har birini yo‘qotishga harakat qilinayotganini ta’kidlagan.

3-fevral, dushanba kuni, JSST bosh direktori Tedros Gebreyesus dunyo “global miqyosdagi xavfli pandemiyaga tayyor emasligini” aytgandi.

“Dunyo uzoq vaqt davomida sikl tarzida talvasadan beparvolik tomon harakatlanib yashadi. Kasallikning tarqalishiga qarshi kurashga pullarni sovuramiz, biroq uni yenggach barchasini esdan chiqarib, kelajakda kelishi mumkin bo‘lgan boshqa bir kasallikning oldini olish uchun hech nima qilmaymiz. Bunday kaltabinlik xavfli va ochig‘ini aytsam, biroz tushunarsiz. Yaxshi tayyorgarlik ko‘rmasak, muvaffaqiyatsizlikka yuz tutamiz”, — deya ogohlantirgandi tashkilot rahbari.

30-yanvarda JSST favqulodda yig‘ilishida Xitoydagi koronavirusni xalqaro miqyosdagi favqulodda holat deb e’lon qilgan. Mutaxassislar 20 dan ko‘proq davlatda qayd qilingan 2019-nCoV koronavirusining tarqalishi tobora pandemiyani eslatib yuborayotganidan ogohlantirmoqda.

XXI asrdagi birinchi pandemiya 2009-yilda cho‘chqa grippi A (H1N1) tarqalishi bo‘lgan. JSST ma’lumotiga ko‘ra, ushbu kasallikdan vafot etganlar soni 100 mingdan 400 minggachani tashkil qilgan. 2010-yil avgust oyida JSST rahbariyati ushbu pandemiya to‘xtaganini e’lon qilgan.

Xitoy sog‘liqni saqlash milliy komissiyasi ma’lumotlariga ko‘ra, mamlakatda 4-fevral holati bo‘yicha 20 438ta koronavirusni yuqtirish holati qayd etilib, vafot etganlar soni 425 kishiga yetdi. Komissiya 2788 ta holatda bemorlarning ahvoli og‘irligini ma’lum qilgan. Hozirga qadar 480 ga yaqin kishi sog‘aygani aytilmoqda.

4-fevral, seshanba kuni, Xitoyning koronavirus o‘chog‘i bo‘lgan Uxan shahrida yangi kasalxona bemorlarni qabul qilishni boshladi. 1000 nafar bemorga mo‘ljallangan kasalxona binosi modul konstruksiyalaridan foydalangan holda 10 kunda qurib bitkazilgandi. Uxanda shu texnologiyani qo‘llagan holda ikkinchi kasalxona qurilishi boshlangan.