Ижтимоий тармоқларда Тошкент метрополитенининг янги қурилган ерусти метро линияларидаги камчиликлар акс этган суратлар ва видеолар тарқалди. Шу сабабли жамоатчилик метро линияларининг мустаҳкамлиги борасида ташвиш билдирмоқда.
Тарқалган видеоларнинг бирида Дўстлик—Қўйлиқ йўналишидаги ерусти метроси поездлари ҳаракатланиши учун қурилган кўприксимон йўлни ушлаб турган устунлар ҳали ишга тушмай туриб дарз кетгани кўрсатилган.
Сергели метро линияси ҳақида тарқалган суратларда эса кўприкларда ёриқлар борлигини кўриш мумкин.
«Ўзбекистон темир йўллари» расмий муносабатида бу борада хавотирга ўрин йўқлигини таъкидлаган ва муҳокамада иштирок этганларнинг ўз фуқаролик позициясини билдириб, вазиятга бефарқ бўлмаганига миннатдорчилик изҳор этди.
Қайд этилишича, Ўзбекистон ҳудудидаги ҳар бир объект қурилиш сифати устидан давлат, идоравий, муаллифлик ва жамоатчилик назоратининг кўп босқичли ва жуда самарали тизими мавжуд. Суратларда тасвирланган ҳолат метро тузилишининг юк кўтариш қобилиятига ёки мустаҳкамлигига таъсир қилмайди.
«Суратларда кўрсатилган ёриқлар куч хусусиятига эга эмас, балки монтаж ишлари давомида пайдо бўлади ва табиийки, улар пардозлаш ишлари давомида бартараф этилади», — дейилган «Ўзбекистон темир йўллари» муносабатида.
Аввалроқ Тошкент метросининг Дўстлик–Қўйлиқ участкасида 6 та бекат қуриб битказилгани хабар берилган эди.
Изоҳ (0)