Собиқ Югославия бўйича халқаро трибунал сербиялик генерал Ратко Младични геноцид, инсониятга қарши ва ҳарбий жиноятлар учун умрбод қамоқ жазосига ҳукм қилди. Бу ҳақда, Ruptly маълумотига таяниб, Meduza хабар бермоқда.
Младичнинг адвокатлари унинг соғлиғи яхши эмаслигини айтиб, бошқа жазо тайинлашни сўраган эди, аммо суд ҳукмни ўзгартиришдан бош тортди.
Младич 11 банд бўйича айбланди. Булар қаторида 1992 ва 1996 йиллардаги Сараево қамали ҳамда 1995 йили Сребреницада 8 минг мусулмоннинг қатл қилиниши бор эди. Айблов Младични умрбод қамоқ жазосига ҳукм этишни сўраган эди — халқаро трибунал тайинлаши мумкин бўлган максимал жазо шу.
Судда Младич бир неча бор айбини инкор қилди. Ҳукм ўқилиши чоғида суд Младичнинг аҳволи ёмонлашгани учун мажлисни тўхтатишдан бош тортди. Шундан сўнг генерал баланд овозда эътироз билдира бошлади ва бунинг натижасида залдан олиб чиқиб кетилди. Унга жараённи телевизор орқали кузатиш имконини беришди.
Изоҳ (0)