АҚШ махсус прокурори Роберт Мюллернинг аппарати мамлакат етакчиси катта маслаҳатчиси ва куёви Жаред Кушнер ўтган йил охири ва жорий йил бошида бошқа давлатлар раҳбарлари билан қандай алоқаларда бўлганини текширмоқда. Бу ҳақда «ТАСС» хабар берди. 

The Wall Street Journal нашри манбаларига кўра, терговчиларни АҚШ президенти Дональд Трамп атрофидаги шахсларнинг 2016 йил декабрида Исроил вакиллари билан маслаҳатлашувлари қизиқтирмоқда. Ўшанда БМТ Хавфсизлик кенгаши Исроилдан Фаластин ерларида жойлашиш билан боғлиқ ҳар қандай фаолиятни зудлик билан тўхтатиш талаб қилинган резолюцияни қабул қилганди. Бу ҳужжат учун Хавфсизлик кенгашига аъзо 15 давлатдан 14 таси овоз берган, АҚШ эса, Исроил расмийларининг резолюцияни блокировка қилиш ҳақидаги илтимосига қарамай, бетараф қолганди. 

Трамп ўша пайтда амалда бўлган Барак Обама маъмуриятини ҳужжат қабул қилинишига йўл қўймасликка чақирганди. Кушнер эса қайнотасининг ёрдамчилари ва Исроил мансабдорлари ўртасида алоқаларни боғлашда муҳим рол ўйнаган бўлиши мумкинлиги тахмин қилинади. 

Шунингдек, терговчиларни ҳамон Кушнернинг Россия вакиллари билан эҳтимолий алоқалари қизиқтирмоқда. 

Мақолада махсус прокурорни Жеймс Комининг ФҚБ директори лавозимидан четлатилиши тафсилотлари ҳам қизиқтираётгани билдирилган. Мюллер бунда Кушнер қандай рол ўйнаганини аниқлик киритишга уринмоқда.