Ўзбекистон Республикаси Президенти Шавкат Мирзиёевнинг 22—25 ноябрь кунлари Жанубий Кореяга ташрифи доирасида қатор соҳалар, хусусан геология соҳасидаги ҳамкорликни кенгайтириш юзасидан келишувлар имзоланиши режалаштирилган. Бу ҳақда айни пайтда Жанубий Кореяда бўлиб турган Халқаро пресс клуб раиси Шерзод Қудратхўжаев маълум қилди.
Хусусан, Ўзбекистон Республикаси Давлат геология ва минерал ресурслар қўмитаси вакиллари кореялик ҳамкасблари билан тўртта олтин объектини ўзлаштириш ва ўрганиш юзасидан келишувга эришди.
Бошланғич босқичда фойдали қазилма конларини ва ўзаро манфаатли майдонларни геологик тадқиқ этишга Жанубий Корея томонидан 10 миллион доллар инвестиция киритилиши кўзда тутилмоқда.
Шунингдек, Shindong Resources компанияси билан ҳамкорликда Навоий вилоятидаги волфрам конини ўзлаштириш бўйича инвестицион лойиҳани амалга татбиқ этиш ишлари давом эттирилади.
Шу билан бирга икки мамлакат геология соҳаси мутахассислари малакасини ошириш бўйича Кванжу шаҳридаги Чоннам миллий университети билан келишув имзоланиши режалаштирилмоқда. Ўзбекистон Республикаси Давлат геология ва минерал ресурслар қўмитаси раиси Бобур Исломов ва Чоннам университети президенти томонидан имзоланадиган мазкур келишув илмий-техник ҳамкорликни кўзда тутади.
Изоҳ (0)