15 ноябрь куни Президент Шавкат Мирзиёев раислигида Ўзбекистонда ҳуқуқбузарликлар профилактикаси ва жиноятчиликка қарши курашиш борасида белгиланган вазифалар ижроси, бу борада мавжуд муаммолар ва уларни ҳал этиш масалаларига бағишланган видеоселектор йиғилиши ўтказилган эди.
Йиғилиш давомида Президент АҚШнинг Нью-Йорк шаҳрида теракт содир этган Ўзбекистон фуқароси — Сайфулло Соипов ҳақида ҳам фикр билдирди. Шавкат Мирзиёевнинг таъкидлашича, Сурия, Ироқ, қўшни Афғонистондаги вазият ва умуман халқаро миқёсдаги радикаллашув жараёни хавотирга сабаб бўлмай қолмайди.
Ўзбекистон фуқароси АҚШга бориб, теракт содир этди. Бундай воқеалар бошқа жойларда ҳам бўляпти. Шунча масжидлар нега ишлаб турибди? Масжидга бориб ибодат қилган инсоннинг дунёқараши ўзгариши керак. Дунёда бўлаётган воқеа-ҳодисаларни инобатга олган ҳолда, нафақат ички ишлар идоралари ходимлари, балки бутун элимиз билан жиноятларга қарши туришимиз керак. Бирор фуқаромиз, бирор фарзандимиз қаерда, нега четда юрибди, деб савол қўяйлик.Эслатиб ўтамиз, келиб чиқиши ўзбекистонлик 29 ёшли Сайфулло Соипов 31 октябрь куни АҚШнинг Нью-Йорк шаҳрида енгил юк машинасида пиёдаларни босиб кетган эди; теракт деб баҳоланган ҳодиса оқибатида саккиз киши ҳалок бўлган. Соипов полиция томонидан қўлга олинган. Дастлабки суд мажлисларида у қилган ишидан пушаймон эмаслигини билдирган.Америкада теракт содир этган фуқаро 2010 йилда кўчиб кетган бўлса ҳам, ота-онаси Ўзбекистонда-ку! Қаерга қараяпмиз? Америкадаги воқеа бўйича бирорта одам, бирорта зиёли, бирорта маҳалла фаоли, бирорта нуроний мақола ёзиб, муносабат билдирмади-я! «Бизнинг элимизга мансуб эмас у!», — деган мазмунда. Қани маҳалла? Қани нуроний? Қани зиёли? Масжидларда имом-хатиблар бу масала бўйича бирор хулоса қилса бўларди-ку.
Шавкат Мирзиёев, Ўзбекистон Президенти
Президент Шавкат Мирзиёев мазкур ҳодиса юзасидан АҚШ давлат раҳбари Дональд Трампга йўллаган таъзияномасида «Ўзбекистон ўз томонидан мазкур террористик актни тергов қилишда кўмаклашиш учун барча куч ва воситаларни ишга солишга тайёр» эканини маълум қилган эди.
Ўзбекистон ҳуқуқ-тартибот идоралари маълумотларига кўра, Тошкентда туғилиб, Молия институтини тамомлаган Соипов «АҚШга чиқиб кетгуни қадар жиноий жавобгарликка тортилмаган, ҳуқуқ-тартибот органлари нигоҳига тушмаган». «Тошкентдаги қўшнилари унга жуда ижобий тавсиф берган; у ҳар доим ўзини босиқ ва дўстона тутган», — дейилади ҳуқуқ-тартибот идоралари баёнотида.
Нью-Йорк штати губернатори Эндрю Куомонинг сўзларига кўра, Соипов АҚШга келганидан сўнг радикал ғоялар таъсирига тушиб қолган. Уни билган АҚШдаги ўзбекистонликларнинг айтишича, Сайфулло «жуда ҳам босиқ эди; тинимсиз ишларди».
Изоҳ (0)