Ўзбекистон мусулмонлари идорасининг Тошкент шаҳар вакили, шаҳар бош имом-хатиби Анвар қори Турсунов Нью-Йоркда теракт содир этган Ўзбекистон фуқароси — Сайфулло Соипов ҳақида фикр билдирди. Унинг интервьюси «Ўзбекистон» телеканали «Таҳлилнома» дастурида эълон қилинди.
Анвар қорининг бу чиқиши Ўзбекистон Президенти Шавкат Мирзиёев раислигида 15 ноябрь куни ўтказилган видеоселектор йиғилиш билан боғлиқ. Унда Президент Нью-Йоркда Сайфулло Соипов томонидан содир этилган терактга тўхталиб, бу ҳолат юзасидан жамоатчилик вакиллари, хусусан, имом-хатиблар бирор муносабат билдирмаганини танқид остига олган эди.
Мавзуга доир: Шавкат Мирзиёев — Сайфулло Соипов ҳақида: «Нега ҳеч ким бу ҳақда муносабат билдирмади?»
Муҳтарам Президентимизнинг ҳаммамиз учун муҳим бир сўзлари бор: «Ё хиёнат, ё садоқат!». Ватанга хиёнат — улуғ гуноҳ. Ўзбек деган улуғ миллатни уларга нисбат бериш мумкин эмас.Сайфулло Соипов 31 октябрь куни АҚШнинг Нью-Йорк шаҳрида енгил юк машинасида пиёдаларни босиб кетган эди; теракт деб баҳоланган ҳодиса оқибатида саккиз киши ҳалок бўлган. Полиция томонидан қўлга олинган Соипов қилган ишидан пушаймон эмаслигини билдирган.Нью-Йоркда бўлган, нобакор Соипов деган боланинг шундай жиноятни қилишига нима сабаб бўлди? Албатта, ўзининг нодонлиги, илмсизлиги, хиёнаткорлиги. Лекин, айни пайтда, биз ҳам ўзимизни масъул сезишимиз керак.
Бу фарзанд кетганига олти-етти йил бўлган экан. Ота-оналар: «Қаерда у, нима қиляпти? Кимлар билан юрибди?», — деб нимага қизиқмайди? Маҳалла нега қизиқмайди? Имом-домлалар, биз-чи? Биз ҳам масъулмиз. Биз ҳам ўзимизни гуноҳкор сезяпмиз.
Бизнинг динимизда яхшиликка чақириш, ёмонликдан тўхтатиш — фарз. Шу фарзни бажармаган одам қаттиқ гуноҳкор бўлади. Шундай экан, ёшларни жиноятчиликдан қайтарайлик.
Анвар қори Турсунов, Тошкент шаҳар бош имом-хатиби
Шавкат Мирзиёев ҳодиса юзасидан АҚШ президенти Дональд Трампга йўллаган таъзияномасида «Ўзбекистон ўз томонидан мазкур террористик актни тергов қилишда кўмаклашиш учун барча куч ва воситаларни ишга солишга тайёр» эканини маълум қилган эди.
Ўзбекистон ҳуқуқ-тартибот идоралари маълумотларига кўра, Тошкентда туғилиб, Молия институтини тамомлаган Соипов «АҚШга чиқиб кетгуни қадар жиноий жавобгарликка тортилмаган, ҳуқуқ-тартибот органлари нигоҳига тушмаган». Тошкентдаги қўшнилари унга жуда ижобий тавсиф берган; у ҳар доим ўзини босиқ ва дўстона тутган.
Нью-Йорк штати губернатори Эндрю Куомонинг қайд этишича, Соипов АҚШга келганидан сўнг радикал ғоялар таъсирига тушиб қолган. Уни билган АҚШдаги ўзбекистонликларнинг айтишича, Сайфулло «жуда босиқ эди; тинимсиз ишларди».
Изоҳ (0)