Жанубий кореяликлар Ўзбекистон Президенти Шавкат Мирзиёевнинг 22—25 ноябрь куни ушбу мамлакатга амалга ошириладиган давлат ташрифини интизорлик билан кутмоқда. Бу ҳақда айни вақтда Жанубий Кореяда бўлиб турган Ўзбекистондаги корейс маданият марказлари ассоциацияси раиси Виктор Пакнинг сўзларига асосланиб, Халқаро пресс клуб раиси Шерзод Қудратхўжаев маълум қилди.
«17 ноябрь куни Ўзбекистонда корейс миллатига мансуб фуқаролар истиқомат қилаётганининг 80 йиллиги кенг нишонланди. Давлатимиз раҳбари бизга табрик йўллади. Бундан биз — корейслар жуда хурсанд бўлдик. Президентимизга бизга шундай ҳурмат ва эътибор кўрсатгани учун чуқур миннатдорчилик билдирамиз. Кореяга келганимга 3—4 кун бўлди. Бу ердаги корейслар ҳам Шавкат Мирзиёевнинг бизга кўрсатаётган эҳтиромидан мамнун. Президентимиз биринчи марта Кореяга келяпти, бутун корейс халқи мазкур ташрифни интиқлик билан кутяпти, чунки бу Кореяда тарихий воқеа бўлади. Умуман олганда, корейслар бу учрашувдан кўп нарса кутяпти», — дейди Олий Мажлис депутати ва Ўзбекистондаги корейс маданият марказлари ассоциацияси раиси Виктор Пак.
Изоҳ (0)