Тошкент шаҳар божхона бошқармаси «Чуқурсой техник идора» темир йўл чегара божхона пости ва контрабандага қарши курашиш бўлими ходимлари билан ҳамкорликда вагон ва контейнерларни божхона текширувидан ўтказиш жараёнида Хитойдан юк қабул қилувчи «Аҳмад Исроил Тех» МЧЖ номига келган маҳсулотлар юкланган контейнер ортилган вагоннинг пастки қисмида ғилдирак жуфтлигининг ўртасига усталик билан яширилган сариқ рангли полиэтилен пакет борлиги аниқланди, деб хабар беради божхона қўмитаси матбуот хизмати.
Мазкур полиэтилен пакет гувоҳлар иштирокида олиниб, очиб кўрилганда, унинг ичида қурол ва уч дона ўқ ҳамда олди қисмига бураб қотириладиган темирдан ясалган қўшимча мослама борлиги аниқланди.
«Агарда ушбу қуролни яшириб олиб ўтиш билан боғлиқ ҳолат божхона ходимлари томонидан ўз вақтида фош этилмаганда манфур мақсадларни кўзлаган жиноятчилар томонидан турли ёвузликлар содир этилиши мумкин эди», — дейилади хабарда.
Ҳозирда мазкур ҳолат юзасидан терговга қадар текширув ишлари олиб борилмоқда.
Маълумот учун, божхона ходимлари томонидан жорий йилнинг ўтган даври мобайнида 56 дона ўқ-отар қуроллари, 643 дона ўқ, 16 685 дона капсула ҳамда 3486 дона гилзаларнинг ғайриқонуний айланмасига чек қўйилган.
Изоҳ (0)