Туркияда IX халқаро билимлар олимпиадаси бўлиб ўтди, деб хабар беради ЎзА.
Анталия сайёҳлик академияси ҳамда Россиянинг EDUANT халқаро мактаби томонидан ташкил этилган олимпиадада ўзбекистонлик мактаб ўқувчилари ҳам муваффақиятли иштирок этди.
Тошкент шаҳридаги Intellect боғча-мактаб нодавлат таълим муассасасининг 25 ўқувчисидан иборат жамоаси 6 олтин, 20 кумуш ва 23 бронза – жами 49 медални қўлга киритди. Улар умумжамоа ҳисобида биринчи ўринни эгаллади ҳамда математика, рус ва инглиз тиллари, тасвирий санъат бўйича тўртта кубокка сазовор бўлди.
IX халқаро билимлар олимпиадасида Озарбайжон, Қозоғистон, Қирғизистон, Россия, Туркия, Ўзбекистон, Украина мамлакатларидан беш юз нафар мактаб ўқувчиси математика, география, физика, кимё, биология, жаҳон тарихи, атроф-муҳит, тасвирий санъат, рус, инглиз ва турк тиллари бўйича ўз билимларини намойиш этди. Мазкур олимпиадада Intellect мактаби директори ўринбосари Н.Баннова раҳбарлигидаги ўқувчилар математика, рус ва инглиз тиллари, тасвирий санъат фанлари бўйича илк бор иштирок этди. Ўқувчилар, шунингдек, «Олимпиада маликаси», «Шон-шуҳрат дақиқаси», «Фотосуратлар танлови» сингари ижодий ва спорт мусобақалари, мини-футбол ва шахмат турнирларида ҳам фаол қатнашди.
Нигина Иноятова (тўртта медаль), Икром Юсупов (тўртта медаль), Жамола Миркомилова (учта медаль) ва Одил Муҳиддинов (учта медаль) IX халқаро билимлар олимпиадасининг энг билимдон иштирокчилари деб эътироф этилди.
Изоҳ (0)