12 ноябрь куни Ўзбекистон – КХДР терма жамоалари ўртасида кечадиган ўйин олдидан ташкил этилган матбуот анжуманининг иккинчи қисмида мезбон жамоа бош мураббийи Самвел Бабаян иштирок этди, дея хабар бермоқда «Uff.uz». Мураббий аввало эртага бўладиган ўйин ҳақидаги фикрларини билдириб ўтди.
«Эртага жуда оғир ва масъулиятли ўйин бўлади. Рақиб КХДР эканини назарда тутсак, бу жамоа ҳурматга лойиқ. Биз ўйинга астойдил тайёргарлик кўрганмиз, рақибнинг кучли ва кучсиз томонларини ўрганиб чиққанмиз. Эртага яхши ўйин намойиш этишга ҳаракат қиламиз», — деди у.
— Эртага бўладиган ўйинда неча нафар ҳужумчи майдонга тушади?— Эртага бўладиган ўйинда неча нафар номинал ҳужумчи майдонга тушиши аҳамиятсиз. Биз имкон қадар жамоа услубини амалга оширишга ҳаракат қиламиз.
— Ёмғирли ҳаво учун алоҳида услуб ишлаб чиққанмисиз?— Биз ҳар қандай ҳолатда ҳам ўз услубимизга мос қолишга ҳаракат қиламиз.
— КХДРнинг кучли томони, қанотлардан тезкор ўйнайди ва жарима майдончасига тўпни аниқ етказиб беради. Бундай ўйинга қарши туришга тайёрмисиз?— Биз рақибни тўлиқ ўрганганмиз ва бу фикрингиз асосга эга. КХДРнинг кучли томонларидан яна бири, уларнинг футболчилари катта иштиёқ ва ватанпарварлик билан ўйнайди. Ҳар бир футболчи икки юз фоиз куч билан ўйнайди. Бизнинг эса ўз яширин қуролимиз бор ва уни эртага қўллашга уриниб кўрамиз.
— Денисов ва Аҳмедов Россия чемпионати ва Евромусобақаларда катта куч йўқотган. Улар эртага ўз савиясида ўйнай оладими?— Профессионал футболчи шунинг учун ҳам профессионалки, у ҳар қандай шароитда ўйнай олиши лозим. Улар эртага майдонга тушиб, бор кучини кўрсатади, деб ўйлайман.
Анжумандан сўнг Самвел Бабаян қисқача тилак билдирди: «Эртага жуда муҳим ўйин бўлади, бу ўйинда стадионга келиб, жамоани қўллашингизни сўрайман».
Изоҳ (0)