ЖЧ—2018 иккинчи саралаш босқичи доирасидаги КХДРга қарши ўйин олдидан Ўзбекистон терма жамоаси ҳужумчиси Александр Гейнрих ўз фикрлари билан ўртоқлашди, деб хабар беради «Championat.asia».
«Бизни жуда қийин ва ўта муҳим учрашув кутиб турибди. КХДРга қарши ўйинга жиддий тайёргарлик кўрмоқдамиз. Бу жамоа ҳақида етарлича маълумотларга эгамиз. КХДРни синчиковлик билан ўрганиб чиқдик. Рақибнинг кучли ва кучсиз тарафлари ҳақида хабардормиз. Бу ўйинда ўзимизнинг футболни намойиш этишимиз лозим бўлади. Бизга фақат ғалаба зарур.
КХДРга қарши дастлабки ўйиндаги мағлубият? Бир нарса дейиш қийин. Сафардаги ўйинда бошқа мураббий бўлганди, шунингдек, сафда мен бўлмаганман. Шу боисдан нега айнан мағлубиятга учраганимиз ҳақида бирор фикр билдира олмайман. Ўша учрашув ёзувини диск орқали томоша қилгандим. Футболчилар сунъий қопламали майдон бўлгани, йўлдаги узоқ парвозлар туфайли чарчоқ аломатлари ўз таъсирини кўрсатганини айтиб ўтганди. Биринчи даврадаги ўйинда бизга қийин бўлган бўлса, энди уларга унданда қийинроқ бўлади. Мухлисларимиздан эса стадионга ташриф буюриб жамоамизни қўллаб-қувватлашларини сўраб қоламан», — дейди Александр Гейнрих.
Эслатиб ўтамиз, Ўзбекистон — КХДР учрашуви 12 ноябрь куни соат 18:00 да «Пахтакор» стадионида бўлиб ўтади.
Изоҳ (0)