“Adolatli Rossiya – haqiqat uchun” partiyasi yetakchisi Sergey Mironov rossiyalik ish beruvchilarni mehnat muhojirlariga Rossiya fuqarolaridan kam bo‘lmagan miqdorda maosh to‘lashga majburlashni taklif qildi, deb yozmoqda “RIA Novosti”.
“Ish beruvchilarni mehnat muhojirlariga Rossiya Federatsiyasining tegishli subyektida bir xil lavozimlarda ishlaydigan Rossiya fuqarolari oladigan maoshdan kam bo‘lmagan ish haqini belgilashga qonunchilik darajasida majburlash taklif etiladi”, — deyiladi Rossiya bosh vaziri Mixail Mishustinga yuborilgan hujjatda.
Mironov ushbu tashabbusni buzganlarga jarima solish va ularni “ko‘p bolali oilalar hayotini yaxshilash”ga yo‘naltirish kerakligini aytdi.
Bundan tashqari, mamlakatda ko‘p bolali oilalarni qo‘llab-quvvatlash va tug‘ilish darajasini oshirish jamg‘armasini tashkil etish zarurligi ham qayd etilgan. Ushbu jamg‘armani moliyalashtirish, boshqa narsalar qatori, muhojirlar mehnatidan foydalanadigan ish beruvchilar uchun qo‘shimcha soliq hisobidan bo‘lishi mumkin. Soliq mehnat muhojirlari daromadining 2 foizi miqdorida belgilanishi mumkin.
Siyosatchi Rossiyadan boshqa davlatlarga pul o‘tkazmalari mavzusiga ham to‘xtalib o‘tdi. Uning fikriga ko‘ra, bunday o‘tkazmalar “Rossiyaning iqtisodiy salohiyati zaiflashishiga olib keladi”, shuning uchun 1 foizlik komissiya joriy qilinishi kerak.
Izoh (0)