Aleksey Navalniyning jamoasi Dubayda Rossiya davlat dumasining 13 nafar deputatining qimmatbaho ko‘chmas mulklari borligini aniqladi.
Deyarli barcha deputatlar hashamatli turar joy majmualaridagi kvartiralarni o‘z yaqinlari nomiga ro‘yxatdan o‘tkazgan. Tergovchilar Dubay yer reyestrini o‘rganib chiqqandan keyin shunday ma’lumotlarni qo‘lga kiritgan.
Dubayda kvartirasi bor deputatlarning aksariyati “Yedinaya Rossiya”dan. Ulardan eng mashhurlari Rossiyaning Ukrainaga hujumi boshlanganidan keyin rafiqasi Dubayda uchta kvartira sotib olgan Vladislav Reznik va “Listvyajnaya” konining egasi Mixail Fedyaevning o‘g‘li Pavel Fedyaev.
2022-yilda Mixail Fedyaev Dubayda jami 361 million rublga (taxminan to‘rt million dollar) 179 va 112 kvadrat metrlik ikkita kvartira sotib olgan. Tergovchilar eng ko‘p ko‘chmas mulkni deputat Aleksandr Prokopyev oilasida aniqladi. Uning opasi Paramount Tower osmono‘par binosining 63-qavatidagi umumiy qiymati 700 million rubl (salkam 8 million dollar) bo‘lgan 11 ta kvartiraga va qurilayotgan Cavalli Casa Tower osmono‘par binosida joylashgan yana bir xonadonga egalik qiladi.
Grigoriy Anikeyev deputatlar orasida eng qimmat kvartiraga egalik qiladi: uning maydoni 1200 kvadrat metr bo‘lgan 557 kvadrat metrli terassali penthausi 2,14 milliard rublga (taxminan 24 million dollar) baholangan. Aksariyat deputatlarning ishlaridan farqli o‘laroq, bu mulkning rasmiy egasi uning qarindoshlari emas, balki o‘zi hisoblanadi.
Qarindoshlari Dubayda kvartiraga ega bo‘lgan “Yedinaya Rossiya”ning boshqa a’zolari orasida deputatlardan Aleksandr Sidyakin, Saygidpasha Umaxanov, Zelimxan Mutsoyev, Raxim Azimov va Ruslan Gadjimov ham bor. Shuningdek, Rossiya liberal demokratik partiyasining ikki deputati (Boris Paikin va Vladimir Koshelev) va ikki kommunistning (Anatoliy Bifov va Roman Lyabixov) oilalari Dubayda kvartiraga ega.
Izoh (0)