Rossiyaning O‘zbekistondagi elchixonasi fuqarolik olish uchun arizalarni qabul qilishni vaqtincha to‘xtatdi. Bu haqda diplomatik vakolatxona xabar berdi.
Qayd etilishicha, 26-oktyabrdan boshlab “Rossiya Federatsiyasi fuqaroligi to‘g‘risida”gi yangi qonun kuchga kirgan.
“Fuqarolik masalalari bo‘yicha arizalarni qabul qilish (fuqarolikning mavjudligi/yo‘qligi to‘g‘risida so‘rovlar bundan mustasno) Fuqarolik masalalarini ko‘rib chiqish tartibi to‘g‘risidagi nizom qabul qilingunga qadar to‘xtatiladi”, — deyiladi xabarda.
Avvalroq Rossiya Tergov qo‘mitasi raisi Aleksandr Bastrikin Rossiya fuqaroligiga ega migrantlar Ukrainadagi jangovar harakatlarda qatnashishdan bosh tortsa, ularni fuqarolikdan mahrum etishni taklif qilgandi.
Shuningdek, rossiyalik deputat Mixail Delyagin o‘zbekistonliklarni Rossiyadan olib ketishga chaqirgan edi. “Milliy tiklanish” demokratik partiyasi Markaziy kengashi raisi Alisher Qodirov va “Yuksalish” umummilliy harakati raisi Bobur Bekmurodov Delyaginning gaplariga javob qaytargan.
Izoh (0)