Rossiyaning amaldagi rahbari Vladimir Putin prezidentlik saylovida ovozlarning 99,76 foizi ko‘rib chiqilgan holatda 87,29 foiz ovoz bilan yetakchilik qilmoqda. Bu haqda Markaziy saylov komissiyasiga tayanib, “RIA Novosti” xabar berdi.
-jaUUszKP.jpg)
Saylovchilarning faolligi Rossiya tarixidagi rekord ko‘rsatkichni qayd etgan. Saylov uchastkalariga 87,1 milliondan ortiq rossiyalik, ya’ni saylovchilarning 77,44 foizi kelgan. Rossiyadagi prezidentlik saylovlarining yakuniy natijalari 21-mart kuni sarhisob qilinadi. Ovozlarning 99,76 foizi hisoblab chiqilgandagi natijalar quyidagicha:
- Rossiya Kommunistik partiyasidan deputat Nikolay Xaritonov — 4,30 foiz;
- “Yangi odamlar”dan duma vitse-spikeri Vladislav Davankov — 3,84 foiz;
- Rossiya Liberal demokratik partiyasidan Leonid Slutskiy — 3,21 foiz.
Rossiya Ichki ishlar vazirligi saylovlar davomida 61 ta jinoiy ish qo‘zg‘atilib, 150 dan ortiq ma’muriy bayonnomalar tuzilganini ma’lum qilgan. O‘tgan saylovlarda saylov qutilariga zelyonka, yod va boshqa bo‘yoqlar quyish, “Molotova kokteyli” uloqtirish, petardalarni portlatish va dasturxonni yoqib yuborish holatlari kuzatilgan.
Putin beshinchi muddatga saylanish maqsadlari qatoriga “harbiy operatsiya” vazifalarini hal etish va Rossiya mudofaa qobiliyati va armiyasini mustahkamlashni kiritgan.
Vladimir Putin ikki yil oldin Ukrainaga “maxsus harbiy operatsiya”, ya’ni urush boshlashni buyurgandi. 2023-yilda Xalqaro jinoiy sud Putinni ukrainalik bolalarning deportatsiyasi bilan bog‘liq holda hibsga olish uchun order bergan. O‘zining avvalgi muddati davomida u Konstitutsiyaga o‘zgartirish kiritib, o‘zining prezidentlik muddatini nollashtirgan.
O‘zbekiston prezidenti Putinni tabrikladi
Shavkat Mirziyoyev 18-mart kuni Rossiyaning amaldagi rahbarini prezident saylovida qozongan ishonchli g‘alabasi bilan tabrikladi. Mamlakat yetakchisi Putinga mustahkam sog‘lik, baxt-saodat va davlatchilik faoliyatida katta muvaffaqiyatlar, Rossiya xalqiga esa tinchlik va ravnaq tiladi.
Izoh (0)