Rossiya Davlat dumasi vitse-spikeri Pyotr Tolstoy Qozog‘iston shaharlari aslida ruslarniki, shu uchun Rossiya ularga nisbatan tarixiy huquqlarga egaligini aytib, Qozog‘istonni rusofobiyada aybladi. Bu haqda u “Komsomolskaya pravda” radiosiga bergan intervyusida ma’lum qildi.
Rossiyalik siyosatchi agar Moskva Ukraina mavzusini “yopmasa”, Qozog‘iston, Armaniston va Rossiyani o‘rab turgan boshqa davlatlar bilan muammolarga duch kelishini aytdi.
Bugun Qozog‘istonda ma’lum bir qozoq davlatini tiklash nuqtayi nazaridan nima sodir bo‘layotganiga qarang. U yerda mustaqillik, lotin alifbosiga o‘tish haqida qanday milliy mifologiya gullamoqda. U yerda juda ko‘p qiziqarli narsalar bor, — dedi Tolstoy.
U qozog‘istonliklar Olmaota 1867-yildan 1921-yilgacha shu nom bilan mavjud bo‘lgan sobiq Verniy shahri ekanini unutib qo‘yishlariga qarshi ekanini aytdi.
Men nimaga qarshi ekanimni bilasizmi? Ular Pavlodardagi rus o‘qituvchilari bu shaharni ruslar qurganini aytgani uchun, kechirim so‘rashga majburlamasinlar. Men ularning Olmaota Verniy shahri, rus kazaklari qal’amiz ekanini unutishlariga qarshiman. Bu tarix milliy o‘zlikni anglashda muhimdir. Rossiyadan ajralish uchun esa tarixni o‘ylab topishning hojati yo‘q. Agar barcha yerlar Xitoyga va barcha mineral resurslar inglizlarga sotilgan bo‘lsa ham, bunday qilish kerak emas. Qo‘shnilar bilan yaxshi munosabatda bo‘lish lozim, — deb javob berdi Davlat dumasi vitse-spikeri.
Ma’lumot o‘rnida, bu taniqli ruslarning Qozog‘istonga nisbatan birinchi bayonoti emas. Yanvar oyida rossiyalik teleboshlovchi Tina Kandelaki Qozog‘istondagi vokzallarning rus tilidagi nomi o‘zgartirilishiga norozilik bildirib, qozoqlarni manqurtlarga qiyoslagandi. U Qozog‘iston “qo‘shnilarining yordami” bo‘lmaganida, o‘z mavjudligini to‘xtatgan bo‘lishini ta’kidlagandi.
2023-yil oxirida Rossiya davlat dumasi deputati Yevgeniy Fedorov Qozog‘istonning SSSR tarkibidan chiqishining noqonuniyligi haqida gapirgandi. Jurnalist Dmitriy Steshin esa Qozog‘istonning shimoliy hududlari tarixan Rossiyaga tegishli ekanini bir necha bor aytgan.
Izoh (0)