Rossiya Davlat dumasi deputati Vitaliy Milonov Kursk va Belgorod viloyatlarining chegaradosh tumanlaridan evakuatsiya qilingan erkaklarga “mujik ekanliklarini” ko‘rsatishni va Mudofaa vazirligi bilan shartnoma tuzishni taklif qildi. Bu haqda deputat “Info24” bilan suhbatda ma’lum qildi.
Deputatning ta’kidlashicha, Kursk viloyatidan evakuatsiya qilingan fuqarolar, shu jumladan, katta yoshdagi erkaklar ham qachon uyga qaytishlari mumkinligi haqida savollar bermoqda.
“Aynan shu chegara aholisiga savol: nega ular uchun kimdir nimadir qilishi kerak, deb o‘ylashadi? Albatta, bunday narsalar uzoqqa cho‘zilmaydi, lekin erkaklar o‘z vatanini himoya qilishi kerakligini qanchalik tez tushunsa, Kursk viloyati uchun shunchalik yaxshi bo‘ladi... O‘ylaymanki, bu viloyatdan faqat ayollar, bolalar va qariyalar evakuatsiya qilinishi kerak, erkaklar esa mujik ekanini ko‘rsatishi, shartnoma imzolab, vatan himoyasiga borishi kerak”, dedi Milonov.
Deputat viloyat aholisi “albatta normal hayotga qaytishiga” ishontirdi. Biroq, uning fikricha, jabrlangan hududlardagi erkaklar Rossiya armiyasi saflarini to‘ldirsa, bunga tezroq erishish mumkin.
Shuningdek, Milonov hozirda o‘zi Kursk viloyatida ekanini aytdi. U vaziyat Rossiya kuchlari nazorati ostida ekani va jangchilar Ukraina qo‘shinlarining Kursk ichkarisiga kirishga urinishlarini to‘sib qo‘yishganini da’vo qildi. Vaholanki, Ukraina Xavfsizlik xizmati maxsus kuchlari viloyatda 102 nafar rossiyalik harbiyni asirga olgan. Ukraina Qurolli kuchlari Kursk viloyatidagi 28 ta aholi punktini nazoratga olgan.
Izoh (0)