G‘arbiy Xitoyda arxeologlar kutilmagan tashqi ko‘rinishga ega bo‘lgan o‘nlab oq tanli, malla sochli, baland bo‘yli mumiyolarni topdilar. Ularning barchasi bundan ming yillar oldin Taklamakon cho‘lida, Tarim daryosi havzasida dafn etilgan. Bu haqda “RIA Novosti” xabar bermoqda.
Ba’zi tadqiqotchilarning fikricha, bu topilmalar qadimgi yevropoid xalqlarining miloddan ancha oldin Osiyo qit’asi markazida mavjud bo‘lganligini ko‘rsatishi mumkin.
Hozirga kelib 300 dan ortiq Tarim mumiyolari ma’lum. Eng mashhuri - Loulan go‘zali, bo‘yi 180 santimetr bo‘lgan to‘q sariq sochli ayol bo‘lib, u taxminan 3800 yil oldin yashagan. Uning tanasi mukammal holatda saqlanib qolgan, shuningdek, unga tegishli narsalar: taroq, savat va bo‘yra ham topilgan.
Yana bir mashhur topilma - Cherchen odami: baland bo‘yli, oq sochli, yuzida tatuirovkalari bor va ko‘plab dafn buyumlari bilan ko‘milgan. Uning yonidan hatto ko‘zlariga ko‘k toshlar qo‘yilgan chaqaloq mumiyosi ham topilgan.
Bu odamlar kim bo‘lgani hali ham noma’lum. Taxminlar orasida Markaziy Osiyoda yashagan sirli xalq — toxarlar ham bor. Shuningdek, qadimgi hind-yevropa xalqlarining migratsiyalari haqida ham farazlar mavjud. Ba’zi manbalarda, masalan, Rim yozuvchisi Katta Pliniy milodiy I asrdayoq Xitoy hududida “o‘rta bo‘ydan baland, zig‘ir sochli va ko‘k ko‘zli” odamlarni tilga olgan.
Tarim mumiyolarining noma’lum kelib chiqishi qadimgi Xitoyning izolyatsiyasi haqidagi avvalgi tasavvurlarni shubha ostiga qo‘yadi va madaniyatlar o‘rtasidagi aloqalar haqida yangi bilimlar qatlamini ochadi.
Aprel oyi boshida Xitoyda neandertal odamlarning izlari topilgani ma’lum bo‘ldi. Topilgan buyumlar G‘arbiy Yevropaga xos uslubda ishlangan bo‘lib, bu ham Sharq ilgari o‘ylanganidek alohida bo‘lmaganini taxmin qilishga asos bo‘ldi.
Izoh (0)