Oliy Majlis Senati raisi Tanzila Norboyeva Butunxitoy xalq vakillari majlisi doimiy qo‘mitasi raisi Chjao Letszi boshchiligidagi delegatsiya bilan uchrashuv o‘tkazdi. Bu haqda Senat matbuot xizmati xabar berdi.
Uchrashuvda O‘zbekiston-Xitoy davlatlarining tarixiy munosabatlari qadimdan to bugunga qadar davom etib kelayotgani, ayniqsa, ikki davlat yetakchilarining do‘stona aloqalari va qatʼiy siyosiy irodasi tufayli ushbu hamkorlik mustahkamlanayotgani alohida eʼtirof etildi.
Tomonlar ikki mamlakat o‘rtasidagi o‘zaro munosabatlarda parlamentlarning tutgan o‘rni yuksak ekanligi, uni amaliy mazmun boyitish lozimligi taʼkidlandi. Bunda parlament do‘stlik guruhlari ishini faollashtirish, o‘zaro tashriflarni amalga oshirish, qo‘mitalar o‘rtasida yaqin munosabatlarni yo‘lga qo‘yish, qonun ijodkorligi va parlament nazorati yo‘nalishlarida tajriba almashish muhimligi qayd etildi.
O‘zbekiston viloyatlari va Xitoyning provinsiyalari mahalliy Kengashlari o‘rtasidagi aloqalarni o‘rnatish, hududiy hamkorlikni kuchaytirish bo‘yicha bildirilgan takliflar mehmonlar tomonidan qo‘llab-quvvatlandi.
Muzokaralar chog‘ida O‘zbekiston va Xitoy hududlari o‘rtasida nafaqat savdo-iqtisodiy balki, madaniy-gumanitar, ilm-fan, taʼlim yo‘nalishlarida ham hamkorlikni yanada chuqurlashtirish lozimligi taʼkidlandi.
Uchrashuv yakunida ikki tomonlama munosabatlarni huquqiy jihatdan mustahkamlash, xalqaro parlament tuzilmalari doirasida hamkorlikni rivojlantirish, o‘zaro tashabbuslarini doimiy qo‘llab-quvvatlashga kelishib olindi.
Izoh (0)