Xitoy 2050-yilga kelib toza energiya ishlab chiqarish uchun termoyadroviy sintez texnologiyasidan foydalanishi mumkin. Bu haqda Bloomberg xabar berdi.
“Sun’iy quyosh” deb nomlanayotgan Xitoy qurilmasi tokamak bo‘lib, u o‘ta qizdirilgan plazmani ushlab turish va termoyadroviy reaksiyalarni davom ettirish uchun kuchli magnit maydonlaridan foydalanadi. 2023-yilda texnologiyani ishlab chiqish uchun 240 million dollar miqdorida sarmoya jalb qilingan.
Ta’kidlanishicha, hozirga qadar termoyadroviy sintezni o‘rganishda faqat bir nechta davlatlar, jumladan, AQSH, Rossiya va Janubiy Koreya sezilarli yutuqlarga erishgan. Biroq, Xitoy bu sohada yetakchilardan biri bo‘lish uchun ilmiy-texnik sa’y-harakatlarini oshirmoqda.
Termoyadroviy sintez sohasidagi tadqiqotlardan tashqari, Pekin kichik quvvatli reaktorlar ishlab chiqarishni ko‘paytirish va an’anaviy atom elektr stansiyalari sonini oshirishni rejalashtirmoqda.
Termoyadro sintezi — bu yengil atom yadrolarining og‘irroq yadrolarga aylanishi va bu jarayonda katta miqdorda energiya ajralib chiqishi jarayonidir. Bu mexanizm Quyosh va boshqa yulduzlarning ishlashi asosida tashkil etiladi.
Atom yadrolarining bo‘linishiga asoslangan an’anaviy yadro energetikasidan farqli o‘laroq, termoyadro reaksiyasi radioaktiv chiqindilar hosil qilmaydi va deyarli tugamas energiya manbai hisoblanadi.
Izoh (0)